Lord Ganesha Statue in Bali: ना दगड, ना सिमेंट! बालीमध्ये साकारली ५० फुटांची गणेशमूर्ती; गिनीज वर्ल्ड रेकॉर्डमध्ये नोंद
Lord Ganesha Statue in Bali इंडोनेशियातील बाली प्रांताच्या जियान्यार भागात ही भव्य गणेशमूर्ती उभारण्यात आली आहे. या मूर्तीची एकूण उंची १५.३१५ मीटर म्हणजेच जवळपास ५० फूट २ इंच इतकी आहे. त्यामुळे या मूर्तीने जागतिक स्तरावर विशेष ओळख निर्माण केली आहे.

Lord Ganesha Statue in Bali: गणपती बाप्पा म्हटलं की आपल्या डोळ्यांसमोर येते ती त्यांची सुंदर आणि प्रसन्न मूर्ती. भारतात गणेशोत्सव मोठ्या उत्साहात साजरा केला जातो. मात्र, आता भारतापासून हजारो किलोमीटर दूर असलेल्या इंडोनेशियातील बाली येथे उभारण्यात आलेल्या भगवान गणेशाच्या एका भव्य मूर्तीची जगभर चर्चा सुरू आहे. तब्बल ५० फुटांपेक्षा अधिक उंच असलेल्या या गणेशमूर्तीने गिनीज वर्ल्ड रेकॉर्डमध्ये आपले नाव नोंदवले आहे. विशेष म्हणजे, ही मूर्ती दगड, सिमेंट किंवा धातूपासून बनवलेली नसून सिंथेटिक रॅटन या खास साहित्यापासून तयार करण्यात आली आहे.
काय आहे या गणेशमूर्तीची खासियत?
इंडोनेशियातील बाली प्रांताच्या जियान्यार भागात ही भव्य गणेशमूर्ती उभारण्यात आली आहे. या मूर्तीची एकूण उंची १५.३१५ मीटर म्हणजेच जवळपास ५० फूट २ इंच इतकी आहे. त्यामुळे या मूर्तीने जागतिक स्तरावर विशेष ओळख निर्माण केली आहे.
गिनीज वर्ल्ड रेकॉर्ड्सने या मूर्तीला ‘जगातील सर्वात उंच सपोर्टेड सिंथेटिक रॅटन मूर्ती’ म्हणून मान्यता दिली आहे. बालीमधील अलास हारुम बाली या कंपनीने ही मूर्ती तयार केली आहे. मूर्तीची रचना आणि तिच्यासाठी वापरण्यात आलेले साहित्य हे या प्रकल्पाचे सर्वात मोठे वैशिष्ट्य आहे.
सिंथेटिक रॅटन म्हणजे नेमके काय?
सामान्यतः मोठ्या मूर्ती तयार करण्यासाठी दगड, सिमेंट, धातू किंवा फायबरचा वापर केला जातो. मात्र, बालीतील या गणेशमूर्तीसाठी सिंथेटिक रॅटनचा वापर करण्यात आला आहे. हे कृत्रिम वेतासारखे दिसणारे साहित्य आहे. त्यापासून आकर्षक आणि वेगवेगळ्या आकारांच्या वस्तू तयार करता येतात. या साहित्याचा वापर करून भगवान गणेशाची भव्य प्रतिमा साकारण्यात आली आहे. मूर्तीची उंची आणि तिची रचना पाहता या निर्मितीचे विशेष कौतुक केले जात आहे. भारतामधील इंडोनेशियाच्या दूतावासानेही या मूर्तीची छायाचित्रे आणि माहिती सोशल मीडियावर शेअर केली आहे. बालीमध्ये या भव्य मूर्तीचे अनावरण करण्यात आल्याची माहिती दूतावासाने दिली आहे.

World’s Tallest Ganesha Idol In Bali
मुस्लिमबहुल देशात हिंदू संस्कृतीचा प्रभाव
इंडोनेशिया हा जगातील सर्वाधिक मुस्लिम लोकसंख्या असलेला देश आहे. येथे इस्लाम हा प्रमुख धर्म असला, तरी देशाच्या संस्कृतीवर हिंदू आणि बौद्ध धर्माचा मोठा प्रभाव दिसून येतो. विशेषतः बाली हे बेट आपल्या हिंदू संस्कृती, धार्मिक परंपरा आणि मंदिरांसाठी जगभर प्रसिद्ध आहे.
बालीमध्ये मोठ्या संख्येने हिंदू धर्माचे पालन करणारे लोक राहतात. येथील दैनंदिन जीवनात हिंदू परंपरा, सण आणि धार्मिक विधींना विशेष महत्त्व आहे. त्यामुळे बालीमध्ये भगवान गणेशाची भव्य मूर्ती उभारण्यात येणे ही स्थानिक संस्कृतीशी जोडलेली महत्त्वाची बाब मानली जात आहे.
बालीमधील प्रसिद्ध हिंदू मंदिरे
बालीमध्ये अनेक प्राचीन आणि प्रसिद्ध हिंदू मंदिरे आहेत. त्यापैकी पुरा बेसाकिह मंदिराला विशेष महत्त्व आहे. या मंदिराला ‘मदर टेंपल’ म्हणजेच बालीमधील प्रमुख मंदिर म्हणून ओळखले जाते. हे मंदिर धार्मिक आणि ऐतिहासिकदृष्ट्या महत्त्वाचे मानले जाते.
याशिवाय समुद्रकिनाऱ्यावर असलेले तनाह लोट मंदिरही पर्यटकांचे आकर्षण आहे. समुद्राच्या पार्श्वभूमीवर उभे असलेले हे मंदिर बालीच्या प्रसिद्ध पर्यटनस्थळांपैकी एक आहे. देश-विदेशातून अनेक पर्यटक या मंदिराला भेट देण्यासाठी येतात.
रामायण आणि महाभारताच्या कथांनाही विशेष महत्त्व
बालीमध्ये केवळ हिंदू मंदिरेच नाहीत, तर रामायण आणि महाभारत या महाकाव्यांचाही सांस्कृतिक प्रभाव पाहायला मिळतो. येथील पारंपरिक नृत्य आणि नाट्यप्रयोगांमधून या महाकाव्यांतील कथा सादर केल्या जातात. बालीचे प्रसिद्ध ‘केचक नृत्य’ हे त्याचे उत्तम उदाहरण आहे. या नृत्यात रामायणातील अनेक प्रसंग सादर केले जातात. सीताहरण आणि रावणाविरुद्धचे युद्ध यांसारखे प्रसंग नृत्याच्या माध्यमातून जिवंत केले जातात.
विशेष म्हणजे, बालीतील ५० फुटांच्या गणेशमूर्तीला मिळालेला हा विक्रम जगातील सर्वात उंच गणेशमूर्तीचा नाही. तर सिंथेटिक रॅटनपासून तयार केलेल्या सर्वात उंच सपोर्टेड मूर्तीचा आहे. त्यामुळे या मूर्तीने आपल्या वेगळ्या निर्मितीमुळे जागतिक स्तरावर लक्ष वेधून घेतले आहे.





