सरन्यायाधीशांवरील बूटफेक प्रकरणी वकिलावर कारवाई नाही; सर्वोच्च न्यायालयाकडून भूमिका स्पष्ट, जाणून घ्या कारण…
Shoe Attack on CJI: BR Gavai | सरन्यायाधीश न्या. भूषण रामकृष्ण गवई यांच्यावर बूट फेकणाऱ्या वकिलावर अवमान कारवाई करण्याचा कोणताही विचार नाही, असे सर्वोच्च न्यायालयाने स्पष्ट केले आहे. स्वत: न्या. गवई यांनीच या वकिलाविरोधात कोणतीही कारवाई करायला नकार दिला असल्याचेही न्या. सूर्य कांत आणि न्या. जॉयमाल्य बागची यांच्या खंडपीठाने सांगितले.
न्या. गवई यांच्यावर ६ ऑक्टोबरला बूट फेकणारे ७१ वर्षीय ॲड. राकेश किशोर यांच्याविरोधात अवमान कारवाई करण्याची मागणी केलेली याचिका सर्वोच्च न्यायालयाच्या वकिलांच्या संघटनेने (एससीबीए) दाखल केली होती. त्यावर सोमवारी सुनावणी झाली असता सर्वोच्च न्यायालयाने आपली भूमिका स्पष्ट केली आहे.
न्यायालयात घोषणाबाजी करणे आणि बूट, पादत्राणे फेकणे हा न्यायालयाचा अवमानच आहे. मात्र, पुढे कारवाई करायची की नाही, याचा निर्णय संबंधित न्यायाधीशावरच अवलंबून असतो, असे यावेळी खंडपीठाने सांगितले. अशा प्रकारच्या घटनांना आळा घालण्यासाठी मार्गदर्शक सूचना आखून देण्याचा विचार केला जाईल. Shoe Attack on CJI: BR Gavai |
तसेच अवमान नोटीस बजावल्याने सरन्यायाधीशांवर बूट फेकणाऱ्या वकिलाला अवाजवी महत्त्व दिले जाईल, यामुळे या घटनेची चर्चा अधिक काळ होत राहील. अशा घटना नैसर्गिकरित्या विस्मृतीत जाऊ द्याव्यात, असे सर्वोच्च न्यायालयाने यावेळी स्पष्ट केले. यावेळी न्यायाधीशांनी देशभरात निरनिराळ्या न्यायालयांमध्ये बूट फेकण्यासारख्या घटनांबद्दल अधिक तपशील संकलित करण्याचे निर्देश महान्यायअभिकर्ता तुषार मेहता यांना दिले. Shoe Attack on CJI: BR Gavai |
काय आहे प्रकरण?
सरन्यायाधीश बी.आर. गवई यांच्यावर वकील राकेश किशोर यांनी ६ ऑक्टोबर २०२५ रोजी सर्वोच्च न्यायालयाच्या कामकाजादरम्यान बूट फेकण्याचा प्रयत्न केला. या गोंधळादरम्यान सरन्यायाधीश शांत राहिले आणि कामकाज सुरू ठेवले. तसेच सरन्यायाधीश गवई यांनी रजिस्ट्रीला त्या व्यक्तीविरुद्ध दंडात्मक कारवाई करू नये असे सांगितले.
तरीही, दिल्ली पोलिसांनी राकेश किशोरची न्यायालयाच्या आवारात अनेक तास चौकशी केली आणि नंतर त्यांना सोडून दिले. त्यानंतर ‘बार कौन्सिल ऑफ इंडिया’ने तत्काळ त्यांचा परवाना निलंबित केला. या घटनेवरुन सर्वच स्तरातून टीका करण्यात आली. याप्रकरणी पंतप्रधान नरेंद्र मोदी यांनी देखील सरन्यायाधीश गवई यांच्यासोबत संवाद साधला होता. Shoe Attack on CJI: BR Gavai |
हेही वाचा:
