Tamil Nadu Exit Poll 2026: तामिळनाडू विधानसभा निवडणूक २०२६ साठीचे मतदान पार पडल्यानंतर आता सर्वांच्या नजरा निकालांकडे लागल्या आहेत. २३ एप्रिल रोजी राज्यात विक्रमी ८४.९ टक्के मतदान झाले असून, सहा दिवसांच्या प्रतीक्षेनंतर आज सायंकाळी एक्झिट पोलची आकडेवारी समोर आली आहे.

या आकडेवारीनुसार, मुख्यमंत्री एम.के. स्टालिन यांच्या नेतृत्वाखालील डीएमके (DMK+) आघाडी पुन्हा एकदा बहुमताचा आकडा गाठून सत्ता राखण्याची शक्यता वर्तवण्यात आली आहे. ‘पीपल पल्स’ आणि इतर प्रमुख संस्थांच्या अंदाजानुसार, राज्यातील २३४ जागांपैकी डीएमके आघाडीला स्पष्ट कौल मिळताना दिसत असला, तरी अभिनेता विजय यांच्या ‘टीव्हीके’ (TVK) पक्षाने पहिल्याच निवडणुकीत केलेली कामगिरी लक्षवेधी ठरण्याची चिन्हे आहेत.

सत्ताधारी डीएमके पुन्हा आघाडीवर –

राज्यातील सत्ता राखण्यासाठी मुख्यमंत्री एम.के. स्टालिन यांनी शिक्षण, आरोग्य आणि जनकल्याणकारी योजनांवर भर दिला होता. त्यांच्या सोबतीला उदयनिधी स्टालिन यांची आक्रमक मोहीमही होती. ‘पीपल पल्स’च्या अंदाजानुसार, डीएमके आघाडीला १२५ ते १४५ जागा मिळण्याची शक्यता आहे, तर ‘चाणक्य स्ट्रॅटेजीज’ने हा आकडा १६० पर्यंत जाईल असा अंदाज वर्तवला आहे.

हेही वाचा -पश्चिम बंगाल विधानसभा निवडणुकीचे धक्कादायक एक्झिट पोल, पहा कोण बनवणार सरकार 

महागाई आणि भ्रष्टाचाराच्या आरोपांमुळे काही प्रमाणात नाराजी असली, तरी स्टालिन यांच्या कामावरील विश्वासामुळे डीएमके पुन्हा सत्तेचे समीकरण जुळवण्यात यशस्वी होताना दिसत आहे.

एआयएडीएमके आणि भाजपची स्थिती –

दुसरीकडे, एडप्पाडी के. पलानीस्वामी (EPS) यांच्या नेतृत्वाखालील एआयएडीएमके (AIADMK+) आघाडीने पश्चिम तामिळनाडू या आपल्या बालेकिल्ल्यात जोर लावला आहे. एक्झिट पोलनुसार, या आघाडीला ६५ ते ८० जागा मिळण्याचा अंदाज असून, सत्ता मिळवण्यासाठी त्यांना अजून मोठी मजल मारावी लागणार आहे.

भाजप आणि एआयएडीएमके यांच्यातील युतीची कामगिरी सुधारली असली, तरी डीएमकेच्या प्रभावापुढे त्यांना मोठी आघाडी घेता आलेली नाही. पक्षांतर्गत कलह आणि सत्ताधाऱ्यांच्या विरोधातील मतांचे विभाजन याचा फटका या आघाडीला बसताना दिसत आहे.

अभिनेता विजय यांचा ‘टीव्हीके’ फॅक्टर –

या निवडणुकीत सर्वात मोठी चर्चा अभिनेता विजय आणि त्यांच्या ‘तमिळगा वेत्री कळघम’ (TVK) या पक्षाची आहे. पहिल्यांदाच निवडणुकीच्या रिंगणात उतरलेल्या विजय यांनी तरुण मतदार आणि शहरी भागांत आपली छाप पाडली आहे. विविध एक्झिट पोल्सनी टीव्हीके पक्षाला १८ ते २६ जागा मिळतील असा अंदाज वर्तवला आहे.

विशेषतः उत्तर तामिळनाडूमधून त्यांनी मोठी मते खेचल्याचे चित्र असून, आगामी काळात ते राज्यातील राजकारणात तिसरा प्रबळ पर्याय म्हणून उदयास येण्याची शक्यता निर्माण झाली आहे.

निकालाची उत्सुकता शिगेला –

विविध सर्वेक्षणांनुसार, ‘प्राजा-पोल’ने डीएमकेला सर्वाधिक १४८ ते १६८ जागांचे भाकीत केले आहे, तर ‘मॅट्रिज’ने एआयएडीएमकेला १०० जागांच्या आसपास स्थान दिले आहे. हे सर्व आकडे केवळ प्राथमिक अंदाज असले, तरी राज्यातील राजकीय कल स्पष्टपणे डीएमकेच्या बाजूने झुकलेला दिसतो. दरम्यान, या सर्व अंदाजांची सत्यता ४ मे रोजी होणाऱ्या मतमोजणीनंतरच स्पष्ट होईल. तोपर्यंत राजकीय विश्लेषक आणि सर्वसामान्यांची उत्सुकता शिगेला पोहोचली आहे.