Ketan Agarwal : केतन अग्रवाल हत्याकांडाच्या तपासात दररोज धक्कादायक खुलासे समोर येत असून, आरोपी सिया आणि चेतन यांनी अत्यंत नियोजनबद्ध पद्धतीने हा कट रचल्याचे उघड झाले आहे. हत्येच्या अवघ्या ३४ मिनिटे आधी दोघांमध्ये गुप्त संभाषण झाल्याचे तपासातून समोर आले असून, ‘बसूयात’ हा हत्येचा कोडवर्ड ठरविण्यात आल्याची माहिती सूत्रांनी दिली आहे.

पोलिसांच्या माहितीनुसार, २६ वर्षीय केतन अग्रवालच्या हत्येचा कट मे महिन्याच्या अखेरीसच रचण्यात आला होता. टोल नाक्यांवरील इलेक्ट्रॉनिक नोंदी आणि सीसीटीव्ही यंत्रणेला चकवा देण्यासाठी सहआरोपी चेतनने कारऐवजी स्कूटरचा वापर करून लोहगड किल्ल्यावर प्रवास केला होता. हत्येनंतरही तो त्याच स्कूटरवरून पुण्यात परतल्याचे तपासात निष्पन्न झाले आहे. संबंधित स्कूटर पोलिसांनी जप्त केली आहे.

हुडीमुळे संशय बळावला –

तपासादरम्यान मिळालेल्या सीसीटीव्ही फुटेजमध्ये केतन आणि सिया एकत्र किल्ल्यावर चढताना दिसत आहेत. त्यांच्या मागे सुमारे २० ते ३० फूट अंतरावर चेतन चालत असल्याचे आढळले. त्यावेळी त्याने चेहरा झाकण्यासाठी हुडी परिधान केली होती. तसेच हुडीवर हेडफोनही घातले होते.

घटनेच्या दिवशी परिसरातील तापमान सुमारे ३३ अंश सेल्सिअस होते. अशा कडक उन्हात ट्रेकिंगसाठी हुडी घालणाऱ्या व्यक्तीबाबत पोलिसांना संशय आला. याच धाग्यावरून तपास पुढे सरकत चेतनपर्यंत पोहोचल्याचे सांगण्यात येत आहे.

‘बसूयात’ हा ठरला कोडवर्ड –

सूत्रांच्या माहितीनुसार, केतनला कड्यावरून खाली ढकलण्यासाठी सिया आणि चेतन यांनी ‘बसूयात’ हा कोडवर्ड निश्चित केला होता. योजनेनुसार, सिया पाणी पिण्याचा किंवा बुटाची लेस बांधण्याचा बहाणा करून खाली वाकणार आणि तोच चेतनसाठी अंतिम इशारा असणार होता. तसेच, केतनने जीव वाचवण्यासाठी सियाला पकडू नये, यासाठीही ती खाली वाकणार होती.

कॉल डिटेल रेकॉर्डनुसार, हत्येच्या अवघ्या ३४ मिनिटे आधी दोघांमध्ये संभाषण झाल्याचे उघड झाले आहे. या संभाषणात सियाने किल्ल्यावरील आपले अचूक ठिकाण तसेच परिसरात इतर पर्यटक नसल्याची माहिती चेतनला दिल्याचा पोलिसांचा प्राथमिक अंदाज आहे.

दरम्यान, रविवारी पोलिसांनी सियाला लोहगड किल्ल्यावर नेऊन घटनास्थळाची पाहणी केली. संपूर्ण घटनाक्रमाची पडताळणी करण्यासाठी डमीचा वापर करून घटनास्थळी प्रात्यक्षिकही करण्यात आले.

सिया आणि चेतन या दोघांना न्यायालयाने ३ जुलैपर्यंत पोलीस कोठडी सुनावली आहे. तपास अद्याप सुरू असून, आणखी महत्त्वाचे पुरावे समोर येण्याची शक्यता व्यक्त करण्यात येत आहे.