Dharmendra Pradhan : नीट आणि सीबीएसई परीक्षांमधील कथित गैरव्यवहारांविरोधात कॉकरोच जनता पार्टी (CJP)च्या वतीने शनिवारी जंतर-मंतर येथे आंदोलन करण्यात आले. पक्षाचे संस्थापक अभिजीत दीपके यांनी केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी करत केंद्र सरकारवर तीव्र टीका केली.

आता देशभरात आंदोलन –

आंदोलनादरम्यान दीपके यांनी शिक्षणमंत्र्यांना सायंकाळी ५ वाजेपर्यंत राजीनामा देण्याची मुदत दिली होती. मात्र, निर्धारित वेळेत राजीनामा न आल्याने आता देशभरात आंदोलनाची तीव्रता वाढविण्यात येणार असल्याची घोषणा त्यांनी केली. येत्या आठवडाभरात विविध शहरांमध्ये निदर्शने आयोजित करण्यात येणार असून पुढील शनिवारी जंतर-मंतर येथे पुन्हा मोठ्या आंदोलनाचे आयोजन करण्यात येणार असल्याचे त्यांनी सांगितले.

उपस्थिक कार्यकर्त्यांना संबोधित करताना दीपके म्हणाले की, सरकारविरोधात आवाज उठविणाऱ्या तरुणांविषयी देशातील अनेक मातांना भीती वाटते. ‘‘मी आंदोलनासाठी भारतात परतत असताना माझ्या आईलाही सरकारकडून कारवाई होईल, अशी चिंता होती. सरकारविरोधात बोलणाऱ्या प्रत्येक तरुणाच्या कुटुंबाला अशीच भीती वाटत असते,’’ असा दावा त्यांनी केला.

हेही वाचा –  खुशखबर ! महाराष्ट्रात मान्सूनची धडाकेबाज एन्ट्री; पुढील 48 तास मुसळधार पाऊस, 25 जिल्ह्यांना अलर्ट 

अनेकांचा आंदोलनाला पाठिंबा –

दरम्यान, या आंदोलनाला आम आदमी पक्षाचे प्रमुख अरविंद केजरीवाल यांनी पाठिंबा दर्शविला आहे. सोशल मीडिया प्लॅटफॉर्म ‘एक्स’वरील पोस्टमध्ये त्यांनी या आंदोलनामागे देशातील युवकांमधील असंतोष आणि नाराजी असल्याचे म्हटले. आंदोलनकर्त्यांना राष्ट्रविरोधी ठरविण्याऐवजी त्यांच्या मागण्यांकडे सरकारने गांभीर्याने लक्ष द्यावे, असे मत त्यांनी व्यक्त केले.

केजरीवाल यांनी पंतप्रधान नरेंद्र मोदी यांनी केंद्रीय शिक्षणमंत्री धर्मेंद्र प्रधान यांना तातडीने पदावरून हटवावे, अशी मागणीही केली. तसेच आम आदमी पक्ष आंदोलनातून मांडण्यात आलेल्या सर्व प्रमुख मागण्यांना पाठिंबा देत असल्याचे त्यांनी स्पष्ट केले.

NEET आणि CBSE परीक्षांच्या पारदर्शकतेबाबत उपस्थित करण्यात आलेल्या प्रश्नांमुळे शिक्षण क्षेत्रातील या वादाला नवे राजकीय परिमाण मिळण्याची शक्यता व्यक्त केली जात आहे. देशभरातून या आंदोलनाला मोठे समर्थन मिळत आहे. अनेक विरोधी राजकीय पक्षांच्या नेत्यांनी तसेच समाजिक कार्यकर्त्यांनी या आंदोलनाला पाठिंबा दिला आहे.