मुंबई – रिपब्लिक चॅनेलचे संपादक अर्णब गोस्वामी यांना दोनवर्षापुर्वीच्या एका आत्महत्येप्रकरणी पोलीसांनी मुंबईतील घरातून अटक केली आहे. पोलीसांकडे कोणतीही अधिकृत कागदपत्रं नसताना ही करावाई केली जात असल्याचा आरोप रिपब्लिककडून करण्यात आला आहे, तर मुंबई पोलीसांनी जबरदस्ती केली, मारहाण केली, असा आरोप अर्णब गोस्वामी यांनी एएनआयशी बोलताना केला आहे.

वास्तुविशारद अन्वय नाईक आत्महत्या प्रकरणी ही कारवाई करण्यात आली आहे. 5 मे 2018 रोजी अन्वय नाईक यांनी अलिबाग येथील राहत्या घरी आत्महत्या केली होती. अन्वय नाईक यांनी आत्महत्येआधी लिहिलेल्या सुसाईड नोटमध्ये पत्रकार अर्णब गोस्वामी यांचं नाव असल्याचं सांगण्यात येत आहे.

 

पैसे थकवल्याचा आरोप करत त्यांनी चिठ्ठीत अर्णब गोस्वामी यांना आत्महत्येला जबाबदार धरण्यात आलं होतं. अन्वय नाईक यांच्या पत्नी अक्षता नाईक यांनीही हा आरोप केला आहे. त्यांनी अर्णब गोस्वामी यांच्यासह तिघांविरोधात गुन्हा दाखल केला होता.

अन्वर नाईक यांच्या पत्नीची प्रतिक्रिया-
माझ्या पतीने तीन जणांची नावं सुसाईड नोटमध्ये लिहिली होती. एआरजी आउट लायर हा शेवटचा प्रोजेक्ट होता. पण, फक्त अर्णब गोस्वामीमुळे त्यांना पैसे मिळाले नाहीत. ते मिळाले असते तर माझे पती आज जिवंत असते, अशी प्रतिक्रिया अन्वर नाईक यांच्या पत्नी अक्षता नाईक यांनी दिली आहे. तसेच अर्णब गोस्वामी हा व्हायरस आहे, त्याला कोणीही न्याय देऊ नये, असेही त्यांनी म्हटले आहे.