Newasa: आगामी स्थानिक स्वराज्य संस्थांच्या निवडणुकांच्या पार्श्वभूमीवर शिवसेनेच्या कार्यकर्त्यांनी मतदार याद्यांच्या कामात सक्रिय होऊन पारदर्शकता आणावी. ही सेवा म्हणजे आपल्या बहिणीला दिलेली ‘ओवाळणी’ समजून प्रत्येकाने किमान एक महिना पक्षाच्या संघटन मजबुतीसाठी द्यावा, असे आवाहन शिवसेनेच्या संपर्कप्रमुख तथा राज्यसभा खासदार डॉ. ज्योती वाघमारे यांनी केले. नेवासा येथे गुरुवारी आमदार विठ्ठलराव लंघे-पाटील यांच्या जनसंपर्क कार्यालयात आयोजित शिवसेना पदाधिकाऱ्यांच्या आढावा बैठकीत त्या बोलत होत्या. यावेळी व्यासपीठावर माजी खासदार सदाशिव लोखंडे, आमदार विठ्ठलराव लंघे-पाटील, शिवसेना नेते प्रभाकर शिंदे, जिल्हाप्रमुख नितीन औताडे, नगराध्यक्ष डॉ. करणसिंह घुले यांच्यासह प्रमुख पदाधिकारी उपस्थित होते. वाघमारे यांनी आपल्या भाषणात उपमुख्यमंत्री एकनाथ शिंदे यांच्या नेतृत्वाचे कौतुक केले. घराणेशाहीच्या राजकारणात एका सामान्य दलित कुटुंबातील मुलीला देशाच्या सर्वोच्च सभागृहात संधी देऊन शिंदे यांनी सामान्य कार्यकर्त्याला बळ दिले आहे, असे त्यांनी आवर्जून नमूद केले. महाभारतातील कौरव-पांडवांचा दाखला देत, राजकारणात केवळ संख्याबळ महत्त्वाचे नसून नीतिमत्ताही तितकीच श्रेष्ठ असल्याचे त्यांनी सांगितले. शिवसेना नेते प्रभाकर शिंदे यांनी यावेळी उत्तर नगर जिल्ह्यातील राजकीय परिस्थितीचा वस्तुनिष्ठ आढावा मांडला. विरोधकांमधील नाराजीचा फायदा घेत पक्षाची ताकद कशी वाढवता येईल, याचे गणित त्यांनी मांडले, ज्याची बैठकीत मोठी चर्चा झाली. आमदार विठ्ठलराव लंघे-पाटील यांनी प्रास्ताविक करून तालुक्यातील कामांचा अहवाल सादर केला. या बैठकीला तालुक्यातील शिवसैनिक, महिला आघाडीच्या पदाधिकारी आणि युवक कार्यकर्ते मोठ्या संख्येने उपस्थित होते. आगामी निवडणुकांमध्ये पक्षाचा भगवा फडकवण्यासाठी आतापासूनच कामाला लागण्याचे निर्देश यावेळी देण्यात आले.
