नेवासा : नेवासा नगरपंचायतीअंतर्गत कार्यरत सुमारे 75 कर्मचाऱ्यांच्या भविष्य निर्वाह निधी (PF) मध्ये ग्रामपंचायत काळापासून सुरू असलेल्या अनियमिततेबाबत भारतीय मजदूर संघाने मुख्याधिकाऱ्यांचे लक्ष वेधले आहे. या प्रकरणी तातडीने कार्यवाही न झाल्यास गुरुवार, 24 जून 2025 पासून सर्व अन्यायग्रस्त निवृत्त आणि कार्यरत कर्मचाऱ्यांसह नगरपंचायत कार्यालयासमोर बेमुदत चक्री उपोषण करण्याचा इशारा भारतीय मजदूर संघाचे नेवासा शाखाध्यक्ष कृष्णा डहाळे यांनी दिला आहे. 2016 मध्ये नेवासा ग्रामपंचायतीचे नगरपंचायतीत रूपांतर झाले असले तरी, ग्रामपंचायत काळापासून कर्मचाऱ्यांच्या भविष्य निर्वाह निधीची रक्कम त्यांच्या खात्यांत जमा झालेली नाही. अनेकदा पाठपुरावा करूनही ही समस्या कायम आहे, आणि सध्या कर्मचाऱ्यांचे PF खाती अपूर्ण स्वरूपात आहेत. याबाबत त्वरित कारवाई न झाल्यास होणाऱ्या आंदोलनामुळे उद्भवणाऱ्या कायदा व सुव्यवस्थेच्या प्रश्नास नगरपंचायत प्रशासन पूर्णपणे जबाबदार राहील, असा इशाराही डहाळे यांनी निवेदनाद्वारे दिला आहे.
