Newasa News : सौंदाळा (ता. नेवासे) येथील (Newasa News) गावठाण ते भेंडा-वडाळा रस्त्यालगत असलेल्या सुमारे दीड किलोमीटर लांबीचा पानंद रस्ता अतिक्रमणातून मुक्त करावा, या मागणीसाठी शेकडो शेतकऱ्यांनी बुधवारी नेवासे-शेवगाव राज्यमार्गावर भरपावसात जोरदार ‘रस्ता रोको’ आंदोलन केले. तहसीलदार व प्रशासनाकडून तातडीने कारवाईचे आश्वासन मिळाल्यानंतर हे आंदोलन तात्पुरते मागे घेण्यात आले.

काय आहेत शेतकऱ्यांच्या प्रमुख मागण्या?
सौंदाळा गावठाण ते भेंडा-वडाळा दरम्यानचा पानंद रस्ता (Newasa News) गेल्या अनेक दिवसांपासून अतिक्रमणाच्या विळख्यात सापडला आहे. यामुळे शेतात ये-जा करण्यासाठी व शेतमाल वाहून नेण्यासाठी शेतकऱ्यांना मोठा मनस्ताप सहन करावा लागत आहे. या समस्येवर कायमस्वरूपी तोडगा काढण्यासाठी आंदोलकांनी खालील मागण्या प्रशासनासमोर मांडल्या.

• पानंद रस्त्यावरील सर्व अतिक्रमणे तात्काळ हटवून रस्ता कायमस्वरूपी खुला करावा.
• भूमी अभिलेख विभागामार्फत रस्त्याचे अधिकृत सीमांकन (मोजणी) करून हद्दीवर दगडी खांब बसवावेत.
• बेकायदेशीर अतिक्रमण करणाऱ्यांवर कडक कायदेशीर कारवाई व्हावी.
• रस्त्याचे समतलीकरण आणि मुरमीकरण करून तो वाहतुकीसाठी योग्य बनवावा.
• या संपूर्ण प्रक्रियेसाठी प्रशासनाने लेखी कालमर्यादा द्यावी.

• 

  Newasa News

प्रशासनाचा हस्तक्षेप व आश्वासन
आंदोलनाची माहिती मिळताच मंडलाधिकारी सरिता मुंडे यांनी घटनास्थळी भेट देऊन आंदोलकांचे निवेदन (Newasa News) स्वीकारले. त्यांनी तात्काळ तहसीलदार यांच्याशी आंदोलकांचे फोनवरून बोलणे करून दिले. “पोलीस बंदोबस्तात पानंद रस्त्यावरील अतिक्रमण हटवून रस्ता तात्काळ मोकळा केला जाईल,” असे स्पष्ट आश्वासन तहसीलदारांनी दिले. प्रशासनाच्या या सकारात्मक भूमिकेनंतर शेतकऱ्यांनी रस्ता रोको आंदोलन स्थगित केले.

पुन्हा तीव्र आंदोलनाचा इशारा
प्रशासनाने दिलेल्या आश्वासनाची ठराविक वेळेत अंमलबजावणी झाली नाही, तर सौंदाळा येथील शेतकरी व ग्रामस्थ शांत बसणार नाहीत. आगामी काळात तहसीलदार कार्यालयासमोर बेमुदत उपोषण, धरणे आंदोलन आणि पुन्हा तीव्र रस्ता रोको केला जाईल, असा इशारा यावेळी आंदोलक शेतकऱ्यांनी दिला.

ग्रामस्थ व शेतकऱ्यांची मोठी उपस्थिती
भरपावसात झालेल्या या आंदोलनात (Newasa News) सरपंच शरदराव आरगडे, बाळासाहेब बोधक, वसंत बोधक, दिलीप बोधक, संकेत बोधक, किशोर बोधक, प्रदीप आरगडे, भाऊसाहेब आरगडे, शोभा बोधक, संगीता बोधक, अनुसया आरगडे यांच्यासह सौंदाळा व परिसरातील शेतकरी आणि ग्रामस्थ मोठ्या संख्येने सहभागी झाले होते.