नेवासा : अहमदनगर जिल्ह्यातील नेवासा नगरपंचायतीत भाजप-शिवसेना महायुतीने स्पष्ट बहुमत मिळवून सत्ता काबीज केल्यानंतर, महायुतीच्या नगरसेवकांनी ‘नेवासे शहर विकास आघाडी’ची अधिकृत स्थापना केली आहे. या आघाडीचे गटनेते तथा प्रतोद म्हणून नगरसेवक महेश शंकरराव लोखंडे यांची सर्वानुमते निवड करण्यात आली. राज्याचे जलसंपदा मंत्री तथा जिल्ह्याचे पालकमंत्री राधाकृष्ण विखे पाटील आणि खासदार डॉ. सुजय विखे पाटील यांच्या मार्गदर्शनाखाली, आमदार विठ्ठलराव लंघे-पाटील आणि पंचगंगा उद्योग समूहाचे संस्थापक शिवसेना नेते प्रभाकर (काका) शिंदे यांच्या नेतृत्वात महायुतीने नेवासे नगरपंचायतीत यश मिळवले. सत्ता स्थापनेच्या पार्श्वभूमीवर नुकतीच ‘नेवासे शहर विकास आघाडी’ची स्थापना करण्यात आली असून, गटनेतेपदी महेश लोखंडे यांची निवड झाली. या आघाडीची गट नोंदणी अहमदनगरचे जिल्हाधिकारी डॉ. पंकज आशिया यांच्याकडे सादर करण्यात आली. यावेळी नगराध्यक्ष डॉ. करणसिंह घुले पाटील यांच्या मार्गदर्शनाखाली नोंदणी प्रक्रिया पूर्ण झाली. समारंभात नगरसेविका शितल डहाळे, मेघा सरकाळे, भारती परदेशी तसेच नगरसेवक प्रवीण सरोदे, अंकुश म्हस्के, अनिल पवार, महेश लोखंडे यांच्यासह इतर नवनिर्वाचित नगरसेवक उपस्थित होते. महेश लोखंडे यांच्या गटनेतेपदी निवडीचे आमदार विठ्ठलराव लंघे-पाटील, शिवसेना नेते प्रभाकर (काका) शिंदे, भाऊसाहेब वाघ आणि इंजिनिअर सुनील वाघ यांनी अभिनंदन केले असून, पुढील वाटचालीस शुभेच्छा दिल्या. दरम्यान, जिल्ह्याचे ‘किंगमेकर’ म्हणून ओळखले जाणारे राधाकृष्ण विखे पाटील आणि डॉ. सुजय विखे पाटील यांच्या नेतृत्वावर विश्वास ठेवून तालुक्यातील आमदार विठ्ठलराव लंघे-पाटील यांचे नेतृत्व स्वीकारत, अपक्ष म्हणून निवडून आलेले नगरसेवक प्रवीण सरोदे यांनी महायुती प्रणीत ‘नेवासे शहर विकास आघाडी’ला पाठिंबा जाहीर केला आहे. त्यांच्या या निर्णयामुळे नेवासे शहराच्या विकासाला अधिक गती मिळेल, असा विश्वास आमदार विठ्ठलराव लंघे-पाटील यांनी व्यक्त केला.
