Newasa News : अहिल्यानगर जिल्ह्यातील नेवासे तालुक्यात (Newasa News) गेल्या काही दिवसांपासून सोनई व परिसरात तीन वेगवेगळ्या ठिकाणी झालेल्या गोळीबार घटनांमुळे खळबळ उडाली असताना, नेवासे पोलिसांनी आज एका मोठ्या कारवाईत यश मिळवले आहे.

नेवासे पोलीस ठाण्याचे पोलीस निरीक्षक महेश पाटील यांच्या मार्गदर्शनाखाली कुकाणा पोलीस दूरक्षेत्राचे पोलीस हवालदार शहाजी आंधळे यांना मिळालेल्या गुप्त माहितीच्या आधारे तरवडी चौकात सापळा रचून एका मालवाहू वाहनातील चालकाला देशी बनावटीच्या पिस्तूलसह जेरबंद करण्यात आले.

कारवाईची सविस्तर माहिती
शनिवारी मिळालेल्या गोपनीय बातमीदाराच्या माहितीनुसार, कुकाणा गावाजवळ नेवासे फाटा – शेवगांव रोडवर एका सुजुकी कंपनीच्या मालवाहू वाहनात (क्र. एम.एच.१६ सी.डी. ४४०५) एक इसम देशी बनावटीचे पिस्तूल बाळगून फिरत असल्याची खात्रीशीर माहिती कुकाणा पोलिसांना मिळाली.

हवालदार शहाजी आंधळे यांनी ही माहिती तात्काळ पोलीस निरीक्षक महेश पाटील यांना कळवली. त्यानंतर कुकाणा पोलीस दूरक्षेत्रात सापळा रचण्यात आला. दोन पंचांना बोलावून घेऊन पोलिस कॉन्स्टेबल अमोल डमाळे, बाळू सावंत, प्रशांत चव्हाण, चंद्रकांत घाडगे, श्रीधर लिपणे हे तरवडी चौकात सापळा लावून थांबले.

सापळ्यात वाहन (एम.एच.१६ सी.डी. ४४०५) आल्यावर पोलिसांनी ते थांबवले. पंचांसमक्ष चालकाची अंगझडती घेतली असता त्याने आपले नाव संतोष कारभारी नरोटे (वय २२ वर्षे), राहणार मोहरी, ता. पाथर्डी, जि. अहिल्यानगर असे सांगितले. अंगझडतीत त्याच्या कमरेत देशी बनावटीचे पिस्तूल (मॅगझीनसह) आढळले. मॅगझीन उघडून पाहिल्यावर त्यात तीन जिवंत काडतुसे आढळले. परवान्याबाबत विचारले असता आरोपीकडून समाधानकारक उत्तर मिळाले नाही. त्यामुळे हे पिस्तूल बेकायदेशीरपणे बाळगल्याची खात्री पटल्याने पोलिसांनी ते जप्त केले.

जप्त मुद्देमाल
– देशी बनावटीचे पिस्तूल (मॅगझीनसह)
– तीन जिवंत काडतुसे
– एक मालवाहू वाहन (क्र. एम.एच.१६ सी.डी. ४४०५)
एकूण किंमत: ४ लाख ५० हजार ९०० रुपये

या प्रकरणी पोलिस कॉन्स्टेबल अमोल डमाळे यांनी नेवासे पोलीस ठाण्यात गु. र. नं. १११/२०२६ अंतर्गत शस्त्र अधिनियम कलम ३/२५ प्रमाणे गुन्हा दाखल केला. आरोपीला अटक करण्यात आली असून, पुढील तपास सहाय्यक पोलीस निरीक्षक अमोल पवार करीत आहेत.

कारवाईत सहभागी अधिकारी
ही कारवाई पोलीस अधीक्षक सोमनाथ घार्गे, अप्पर पोलीस अधीक्षक सोमनाथ वाकचौरे, अप्पर पोलीस अधीक्षक वैभव कलुबर्मे, शेवगाव उपविभागीय पोलीस अधिकारी निरज राजगुरु यांच्या मार्गदर्शनाखाली पार पडली. यात पोलीस निरीक्षक महेश पाटील, सहाय्यक पोलीस निरीक्षक अमोल पवार, पोलीस उपनिरीक्षक अहिरे, पोलीस हवालदार शहाजी आंधळे, पोलीस कॉन्स्टेबल अमोल डमाळे, संदीप ढाकणे, होमगार्ड बाळू सावंत, प्रशांत चव्हाण, चंद्रकांत घाडगे, श्रीधर लिपणे यांचा समावेश होता.

या कारवाईमुळे नेवासे तालुक्यातील गुन्हेगारीला चाप बसण्यास मदत होईल, अशी अपेक्षा व्यक्त केली जात आहे. स्थानिक नागरिकांनी पोलिसांना मिळालेल्या गुप्त माहितीचे कौतुक केले असून, अशा घटनांवर कठोर कारवाई सुरू राहणार असल्याचे पोलिसांनी स्पष्ट केले आहे.