Newasa News : श्री बालाजी देवस्थानच्या यात्रा महोत्सवाच्या धामधुमीत देडगावने एक ऐतिहासिक आणि सामाजिक क्रांती (Newasa News) घडवून आणली आहे. रूढी-परंपरांच्या विळख्यातून बाहेर पडत अहिल्यानगर जिल्ह्यातील तिसरे ‘बालविवाहमुक्त गाव’ बनण्याचा बहुमान देडगावने पटकावला आहे.

नगर तालुक्यातील (Newasa News) रुईछत्तीसी आणि पारनेर तालुक्यातील करंदी यांच्यानंतर आता नेवासे तालुक्यातील देडगावने या यादीत मानाचे स्थान मिळवून संपूर्ण जिल्ह्यासमोर नवा आदर्श उभा केला.

सोमवार, दि. २६ ऑक्टोबर रोजी श्री बालाजी स्मार्ट केअर हॉस्पिटल, भक्तनिवास येथे स्नेहालय संचलित केअरिंग फ्रेंड्स हॉस्पिटल, उडान प्रकल्प, स्नेहाधार टीम, श्री बालाजी स्मार्ट केअर हॉस्पिटल आणि श्री बालाजी मंदिर देवस्थान ट्रस्ट यांच्या संयुक्त विद्यमाने भव्य मोफत महिला आरोग्य तपासणी शिबिर व बालविवाहमुक्त गाव प्रमाणपत्र प्रदान सोहळा मोठ्या उत्साहात पार पडला.

नेवासे मतदारसंघाचे (Newasa News) आमदार विठ्ठलराव लंघे-पाटील यांच्या हस्ते गावाला हे अधिकृत प्रमाणपत्र बहाल करण्यात आले. यावेळी सरपंच चंद्रकांत मुंगसे, देवस्थान ट्रस्टचे अध्यक्ष भाऊसाहेब मुंगसे, उपाध्यक्ष सुभाष चोपडा, सचिव ज्ञानदेव कदम यांच्यासह ट्रस्टचे सर्व पदाधिकारी आणि ग्रामस्थ मोठ्या संख्येने उपस्थित होते.

आमदार लंघे-पाटील यांनी स्नेहालयच्या सामाजिक उपक्रमांचे मनःपूर्वक कौतुक करत, बालविवाह रोखणे आणि महिलांचे आरोग्य सुदृढ ठेवणे ही ग्रामीण भागाच्या सर्वांगीण विकासाची खरी गरज असल्याचे स्पष्ट केले.

देवस्थानच्या यात्रेला सामाजिक बांधिलकीची जोड देत आयोजित केलेल्या शिबिरामध्ये स्त्रीरोगतज्ज्ञ डॉ. अंशू मुळे, आयुर्वेदाचार्य डॉ. मानसी कांबळे, डॉ. मनीषा जव्हारे, डॉ. रेश्मा बाफना आणि डॉ. संदीप लांडगे यांच्या तज्ज्ञ मार्गदर्शनाखाली शेकडो महिलांची सखोल तपासणी करण्यात आली.

यामध्ये रक्तदाब, रक्तातील साखर, हिमोग्लोबिन, रक्तगट, नेत्र तपासणी करून मोफत औषधोपचार पुरवण्यात आले. केवळ तपासणीपुरते मर्यादित न राहता महिला आरोग्य, स्तनपानाचे महत्त्व आणि कर्करोग जनजागृतीवर विशेष संवाद सत्रे घेऊन महिलांना आरोग्याचा मूलमंत्र देण्यात आला.

स्नेहालयचे संस्थापक डॉ. गिरीश कुलकर्णी यांच्या दूरदृष्टीतून आणि जिल्हा परिषद सीईओ आनंद भंडारी यांच्या मार्गदर्शनाखाली ‘उडान’ प्रकल्पांतर्गत संपूर्ण अहिल्यानगर जिल्हा २०२७ पर्यंत पूर्णपणे बालविवाहमुक्त करण्याचा विडा उचलण्यात आला आहे. आतापर्यंत जिल्ह्यातील तब्बल १३२७ ग्रामपंचायतींनी बालविवाहमुक्तीचा ठराव केला असून ५३ गावे प्रमाणपत्र मिळवण्याच्या अंतिम टप्प्यात पोहोचली आहेत.

समाजात कुठेही बालविवाहाची चाहूल लागल्यास तातडीने १०९८, ११२ किंवा स्नेहालय उडान हेल्पलाइन ९०११०२६४९५ वर संपर्क साधावा, असे आवाहन प्रकल्प व्यवस्थापक प्रवीण कदम यांनी या वेळी केले. कार्यक्रमाचे (Newasa News) प्रभावी सूत्रसंचालन आर. जे. कोमल भद्रे यांनी केले, तर उपस्थितांचे आभार वैशाली चोपडा यांनी मानले.