Newasa : लोकनेते मारुतराव घुले पाटील ज्ञानेश्वर सहकारी साखर कारखान्याच्या अध्यक्षपदी माजी आमदार नरेंद्र मारुतराव घुले पाटील, तर उपाध्यक्षपदी सुधाकर ऊर्फ काकासाहेब नारायणराव नरवडे पाटील यांची मंगळवारी (दि. ३०) बिनविरोध निवड करण्यात आली.

कारखान्याच्या अतिथीगृहात निवडणूक निर्णय अधिकारी मंगेश सुरवसे यांच्या अध्यक्षतेखाली नवनिर्वाचित संचालक मंडळाची बैठक पार पडली. अध्यक्षपदासाठी नरेंद्र घुले पाटील आणि उपाध्यक्षपदासाठी काकासाहेब नरवडे पाटील यांचे प्रत्येकी एकच उमेदवारी अर्ज दाखल झाल्याने दोघांचीही बिनविरोध निवड झाल्याची घोषणा करण्यात आली.

यापूर्वी कारखान्याच्या २१ संचालक पदांची निवडणूकही माजी आमदार नरेंद्र घुले पाटील व माजी आमदार चंद्रशेखर घुले पाटील यांच्या नेतृत्वाखाली बिनविरोध झाली होती.

निवडीनंतर बोलताना नरेंद्र घुले पाटील म्हणाले, “ज्ञानेश्वर सहकारी साखर कारखान्याच्या माध्यमातून महसूल निर्मिती होत असून शेतकरी आणि कामगारांच्या घरात लक्ष्मी पोहोचविण्याचे कार्य सुरू आहे. लोकनेते मारुतराव घुले पाटील यांनी शेतकरी, कामगार आणि कष्टकऱ्यांच्या श्रमाला प्रतिष्ठा मिळवून देण्याची परंपरा निर्माण केली. ही परंपरा पुढेही कायम ठेवत सर्वांना सोबत घेऊन कारखान्याचा विकास साधला जाईल.”

ते पुढे म्हणाले, “संचालक निवडणुकीसाठी तब्बल २५० इच्छुकांनी अर्ज भरले होते. मात्र संघटनेवर विश्वास ठेवून सर्वांनी अर्ज मागे घेतल्याने निवडणूक बिनविरोध झाली. यासाठी माजी मंत्री शंकरराव गडाख, आमदार विठ्ठलराव लंघे तसेच सर्वपक्षीय कार्यकर्ते व सभासदांचे मोलाचे सहकार्य लाभले. ज्ञानेश्वर कारखाना हा शेतकरी-कामगारांची कामधेनू असून भविष्यातही रचनात्मक कामांना प्राधान्य दिले जाईल.”

राज्यातील साखर उद्योगात ज्ञानेश्वर कारखान्याने स्वतंत्र ओळख निर्माण केली असून, माजी आमदार चंद्रशेखर घुले पाटील यांना कमी वयात राज्य साखर संघाच्या अध्यक्षपदाची संधी मिळणे ही कारखान्याच्या सक्षम व्यवस्थापनाची पावती असल्याचेही त्यांनी नमूद केले.

यावेळी माजी आमदार चंद्रशेखर घुले पाटील, माजी आमदार पांडुरंग अभंग, राज्य साखर कामगार फेडरेशनचे सरचिटणीस नितीन पवार, संचालक मंडळातील सदस्य, सहाय्यक निवडणूक निर्णय अधिकारी देविदास घोडेचोर, कार्यकारी संचालक अनिल शेवाळे, सरव्यवस्थापक रविंद्र मोटे, कामगार संचालक सुखदेव फुलारी यांच्यासह अनेक मान्यवर उपस्थित होते.

निवडीनंतर अध्यक्ष व उपाध्यक्षांसह संचालक मंडळाने लोकनेते मारुतराव घुले पाटील यांच्या स्मृतिस्थळाला अभिवादन केले. त्यानंतर विविध संस्था, सभासद व कार्यकर्त्यांच्या वतीने नवनिर्वाचित पदाधिकाऱ्यांचा सत्कार करण्यात आला. कार्यक्रमाच्या शेवटी संचालक पंडितराव भोसले यांनी आभार मानले.