जामखेड : कर्जत आणि जामखेड तालुक्यातील सर्वसामान्य नागरिकांना, वकिलांना तसेच पक्षकारांना वेळेवर व सुलभ न्याय मिळावा यासाठी विधानपरिषद सभापती प्रा. राम शिंदे यांच्या माध्यमातून सुरू असलेल्या सातत्यपूर्ण पाठपुराव्याला मोठे यश मिळाले आहे. कर्जत येथे ‘जिल्हा व अतिरिक्त सत्र न्यायालय’ स्थापन करण्यास राज्य मंत्रिमंडळाने अंतिम मान्यता दिली आहे. प्रा. राम शिंदे यांच्या पुढाकारामुळे कर्जत-जामखेडच्या न्यायव्यवस्थेला एक नवी दिशा व मोठी ताकद मिळाली असून परिसरातून त्यांच्यावर अभिनंदनाचा वर्षाव होत आहे.

या महत्त्वपूर्ण निर्णयासोबतच न्यायालयाच्या कामकाजासाठी आवश्यक असणाऱ्या मनुष्यबळाला आणि पदनिर्मितीला प्रशासकीय मान्यता मिळाली आहे: न्यायिक अधिकारी: १ पद शासकीय अभियोक्ता कार्यालयासह २२ पदे  ७ कर्मचाऱ्यांची सेवा बाह्य यंत्रणेद्वारे उपलब्ध करून देण्यास मंजुरी देण्यात आली आहे या निर्णयामुळे स्थानिक पातळीवरच सत्र न्यायालयाचे कामकाज चालणार असून नागरिकांचे होणारे हाल, वेळ आणि पैशांची मोठी बचत होणार आहे.

या अत्यंत संवेदनशील आणि जनहितार्थ निर्णयाबद्दल महाराष्ट्र विधानपरिषदेचे सभापती प्रा. राम शिंदे यांनी राज्याचे मुख्यमंत्री. देवेंद्र फडणवीस व महायुती सरकारचे आभार व्यक्त केले आहेत. कर्जत येथे जिल्हा व अतिरिक्त सत्र न्यायालय मंजूर झाल्याची बातमी समजताच कर्जत आणि जामखेड तालुक्यातील नागरिक, वकील संघ आणि लोकप्रतिनिधींमध्ये उत्साहाचे वातावरण निर्माण झाले आहे. प्रा. राम शिंदे यांच्या दूरदृष्टी आणि लोकप्रतिनिधी म्हणून असलेल्या कणखर भूमिकेमुळेच हा ऐतिहासिक निर्णय शक्य झाल्याचे मत स्थानिक नागरिकांनी व्यक्त केले आहे.

 

कर्जत आणि जामखेड भागातील जनतेची ही अनेक वर्षांपासूनची मागणी होती. या निर्णयामुळे सर्वसामान्यांना दारात न्याय मिळण्याचा मार्ग मोकळा झाला आहे. महायुती सरकारने या भागातील जनतेच्या भावनेचा आदर करत हा निर्णय घेतला, याबद्दल मी सरकारचे आभार मानतो.
प्रा. राम शिंदे (सभापती, महाराष्ट्र विधानपरिषद)