Arvind Kejriwal: दिल्लीचे मुख्यमंत्री अरविंद केजरीवाल यांच्या जामीन अर्जावर सर्वोच्च न्यायालयात गुरुवारी सुनावणी होणार आहे. दिल्ली अबकारी धोरण घोटाळ्यात सीबीआयने केलेल्या अटकेला त्यांनी याचिकेत आव्हान दिले आहे. न्यायमूर्ती सूर्यकांत आणि न्यायमूर्ती उज्जल भुईया यांचे खंडपीठ या प्रकरणाची चौकशी करणार आहे. सर्वोच्च न्यायालयाने 23 ऑगस्ट रोजी सीबीआयला या प्रकरणात प्रति शपथपत्र दाखल करण्याची परवानगी दिली होती आणि उत्तर दाखल करण्यासाठी केजरीवाल यांना दोन दिवसांची मुदत दिली होती. त्यावर आता उद्या सुनावणी होणार आहे. यावेळी अरविंद केजरीवाल यांना सुप्रिम कोर्टाकडून दिलासा मिळण्याची अपेक्षा आहे.
