Nepal Bus Accident : नेपाळच्या मध्य प्रांतात झालेल्या एका रस्ते अपघातामध्ये भारतातील ७ यात्रेकरूंचा मृत्यू झाला आहे. तर पाच इतर भारतीय यात्रेकरूंना रुग्णालयात उपचारासाठी दाखल करण्यात आले आहे. इतर दोन नेपाळी नागरिकही गंभीर जखमी झाले असल्याचे अधिकाऱ्यांनी सांगितले. मनकामना मंदिराच्या तीर्थयात्रेवरून परतणाऱ्या प्रवाशांना घेऊन जाणाऱ्या मायक्रोबसला गोरखा येथील शहीद लखन ग्रामीण नगरपालिका-३ जवळ हा अपघात झाला. बसमधील १४ पैकी सात जणांचा जागीच मृत्यू झाला, असे गोरखा जिल्हा पोलीस कार्यालयाचे पोलीस अधीक्षक भरत बहादूर बीके यांनी सांगितले. मृत भारतीयांमध्ये ५ पुरुष आणि २ महिलांचा समावेश आहे. इतर सात प्रवासी गंभीर जखमी झाले असून त्यांच्यावर सध्या चितवनमधील भरतपूर येथील कॉलेज ऑफ मेडिकल सायन्सेसमध्ये उपचार सुरू आहेत. जखमींपैकी ५ जणांची प्रकृती चिंताजनक आहे. बसचे ब्रेक निकामी झाल्यामुळे हा अपघात झाला. ब्रेक नादुरुस्त असल्याचे चालकाच्याही ध्यानात आले होते. त्या ठिकाणची रस्त्याची स्थितीही तितकीशी चांगली नव्हती. स्थानिकांनी रस्त्यावरील पाणी काढून टाकण्यासाठी तात्पुरती व्यवस्था केली होती, असे एका कर्मचाऱ्याने सांगितले.
