Masoud Pezeshkian : इराण-इस्रायल-अमेरिका यांच्यातील संघर्षामुळे हे देश जगभरात चर्चेच्या केंद्रस्थानी आहेत. या देशांमधील परस्परवाटाघाटी संदर्भात सातत्याने चर्चेच्या फेऱ्या पार पडल्या असून तोडगा निघाल्याचं अंतिम करण्यात आलेलं नाही. या परिस्थितीमुळे आगामी काळात नेमके काय निर्णय होतात याकडेच सर्वांचे लक्ष लागलेले असताना इराणचे राष्ट्राध्यक्ष (Masoud Pezeshkian) मसूद पेझेश्कियान यांनी इराण-इस्रायल-अमेरिका यांच्यातील दीर्घकाळ चाललेल्या संघर्षावर नुकत्याच दिलेल्या एका मुलाखतीत मोठं विधान केलं आहे.

पेझेश्कियन यांनी शुक्रवार, ७ ऑगस्ट रोजी इराणच्या सरकारी टीव्हीवर प्रसारित झालेल्या एका मुलाखतीत संघर्षावर भाष्य केलं. हे युद्ध इराणने सुरू केलं नसल्याचं वक्तव्य त्यांनी केलं असून, सर्व दबाव आणि आव्हाने असूनही इराण माघार घेण्याऐवजी स्वतःला अधिक मजबूत करण्याचा प्रयत्न करत असल्याचं इराणचे राष्ट्राध्यक्ष मसूद पेझेश्कियान यांनी स्पष्टपणे सांगितलं. ना मागे हटणार ना झुकणार शेवटच्या श्वासपर्यंत लढत राहणार असं मोठं विधान त्यांनी केलं आहे.

परंतु परिस्थिती हळूहळू युद्धाकडे सरकली : मसूद पेझेश्कियान

“लष्करी दबावाद्वारे इराणला कमकुवत करण्याचा प्रयत्न करण्यात आला. इराणने तो हाणून पाडला आहे. या कठीण काळातही इराण आज एक मजबूत राष्ट्र म्हणून उभा आहे. जेव्हा मुस्लिम एकत्र येतात, तेव्हा ते बाहेरील लोकांच्या दुष्ट योजना आणि आव्हानांना धैर्याने तोंड देऊ शकतात. हा संघर्ष आम्ही सुरू केला नाही. युद्धापूर्वी इराणने चर्चेद्वारे हा प्रश्न सोडवण्याचा प्रयत्न करत होते, परंतु परिस्थिती हळूहळू युद्धाकडे सरकली.” असा खुलासही त्यांनी यावेळी बोलताना केला.

यावेळी बोलताना इराणच्या राष्ट्राध्यक्षांनी एक मोठा दावा केला आहे. ते म्हणाले “सीरियाप्रमाणेच ४८ तासांत इराणवर ताबा मिळवण्याची योजना आखली होती. मात्र इराणने आपली ताकद आणि क्षमता दाखवून त्यांच्या योजना हाणून पाडल्या. सध्याच्या परिस्थितीने हे सिद्ध केले आहे की इराणला सहजपणे कमकुवत किंवा अस्थिर केले जाऊ शकत नाही.”

मोजतबा खामेनी सार्वजनिक ठिकाणी क्वचितच दिसले, कारण…

इराणवरील अमेरिका आणि इस्रायलच्या हल्ल्यांमध्ये तत्कालीन सर्वोच्च नेते अली खामेनी मारले गेले होते. त्यानंतर त्यांचे पुत्र मोजतबा खामेनी यांची देशाचे सर्वोच्च नेते म्हणून नियुक्ती करण्यात आली. मात्र. मोजतबा खामेनी इराणचे सर्वोच्च नेते झाल्यापासून सार्वजनिक ठिकाणी क्वचितच दिसले आहेत. यामागे सुरक्षा आणि आरोग्याची कारणे दिली जातात.

दरम्यान, अमेरिकेचे अध्यक्ष डोनाल्ड ट्रम्प यांनी ६ ऑगस्ट रोजी इराणसोबतचा संघर्ष लवकरच संपेल, अशी आशा व्यक्त केली. तसेच काही महत्त्वाच्या शस्त्रास्त्रांच्या पुरवठ्यात अमेरिकन सैन्याला अडचणी येत असल्याचेही त्यांनी सांगितले. या पार्श्वभूमीवर पेझेश्कियन यांनी पुन्हा एकदा स्पष्ट केले की, वाढत्या दबावानंतरही इराण माघार घेणार नाही आणि अधिक सक्षम राष्ट्र म्हणून पुढे वाटचाल करेल. त्यामुळे पुढं काय घडणार याकडे सर्वांचे लक्ष लागले आहे.

Ganesh Rayte : दु:खद बातमी! सलमान खानच्या घराबाहेर सुरक्षेसाठी तैनात असलेल्या पोलीस कॅान्स्टेबलचा मृत्यू