प्रभात वृत्तसेवा इंदापूर – इंदापूर नगरपरिषदेच्या आगामी निवडणुकीच्या पार्श्वभूमीवर राष्ट्रवादी काँग्रेसमध्ये (अजित पवार गट) कार्यकर्त्यांची हालचाल सुरू झाली आहे. बुधवारी (दि. 5) इंदापूर शहरात झालेल्या कार्यकर्त्यांच्या बैठकीत पक्षाचे शहरातील वरिष्ठ नेते व माजी उपनगराध्यक्ष धनंजय बाब्रस व माजी नगराध्यक्ष विठ्ठल ननवरे यांनी पत्रकार परिषदेत बोलताना स्पष्ट भूमिका मांडली की, इंदापूर नगराध्यक्षपदासाठी प्रदीप गारटकर हाच योग्य आणि सक्षम चेहरा आहे.बैठकीत उपस्थित सर्व पदाधिकारी आणि कार्यकर्त्यांनी प्रदीप गारटकर यांच्या उमेदवारीस एकमुखी पाठिंबा दर्शवला. यावेळी धनंजय बाब्रस म्हणाले, गारटकर यांचा नगरपरिषदेतील अनुभव प्रचंड आहे. 1992 च्या सुमारास त्यांनी नगराध्यक्षपद भूषवले आणि शहराच्या विकासाचा पाया रचला. त्यांनी तरुणांच्या हाताला काम देत प्रत्येक घराघरात विकासाचे चैतन्य निर्माण केले. पतीत पावन संघटनेच्या माध्यमातून तरुणांची शक्ती उभी केली आणि सलग 15 वर्ष शहरासाठी उल्लेखनीय कार्य केले. बाब्रस पुढे म्हणाले, गारटकर यांनी अद्याप अधिकृत निर्णय जाहीर केलेला नसला, तरी आम्ही पक्षाध्यक्ष उपमुख्यमंत्री अजित पवार आणि कृषी मंत्री दत्तात्रय भरणे यांच्याशी चर्चा करून गारटकर यांच्या उमेदवारीचा आग्रह धरणार आहोत. दरम्यान, माजी नगराध्यक्ष विठ्ठल ननवरे म्हणाले, इंदापूर शहराला अडचणीतून बाहेर काढण्याचे सामर्थ्य प्रदीप गारटकर यांच्यात आहे. त्यांच्याच नेतृत्वाखाली शहराचा सर्वांगीण विकास शक्य आहे. यावेळी सुरेश गवळी, अनिल राऊत, दादासाहेब सोनवणे, संतोष ढोले, कुमार ढोले, यांच्यासह राष्ट्रवादी काँग्रेस (अजित पवार गट) चे अनेक पदाधिकारी आणि कार्यकर्ते उपस्थित होते.
