गडचिरोली  – काकांनी लहान वयात करून देत असलेला विवाह टाळण्यासाठी अवघ्या 13 वर्षांची असताना नक्षलवादी चळवळीत सहभागी झालेल्या तरूणीने 20 व्या वर्षी पोलिसांपुढे शरणागती स्वीकारली आहे.

सविता नरोटी या अनेक गुन्हे दाखल असलेल्या 20 वर्षांची तरुणी. सविता उर्फ करिष्मा उर्फ गंगा नरोटी. दिसायला अगदी लहान चणीची ही युवती अनेकांच्या मनात धडकी भरवत असे. सात वर्षात तीने अनेक नक्षली कारवायांत सहभाग घेतला आहे.

जांभूळखेडा येथे झालेल्या चकमकीत ती नक्षल्यांकडून सहभागी झाली होती. त्यात 15 जवान शहीद झाले होते. त्यानंतर तिच्यावर दोन लाखाचे इनाम जाहीर करण्यात आले होते. तिने एकूण 14 चकमकीत पोलिसांशी दोन हात केले आहेत.

तिच्यावर चार जणांच्या हत्येचे अरोप असून कडवी नक्षलवादी अशी तिची ओळख आहे. सध्या गडचिरोली भागात रोजागाराच्या अनेक संधी निर्माण झाल्याने तरूण नक्षलवादाकडे फारसे फिरकत नाहीत. त्यामुळे चळवळीत जान ठेवण्यासाठी छत्तिसगढमधून काही नक्षलवादी या भागात पाठवले.

सविता त्यातून येथे आली. येथे आल्या नंतर एक कंपनीत काम करणाऱ्या तरूणाशी सविताची ओळख झाली. जाता येता झालेल्या ओळखीचे रुपांतर प्रेमात झाले. पण तिचा भूतकाळ विवाह करण्यात अडथळा ठरत होता. अखेर प्रेमाचा विजय झाला.

सविताने शरणागती स्वीकारत आपल्या विवाहाचा आणि सुखकर आयुष्याचा मार्ग खुला केला. गडचिरोलीत केंद्रीय राखीव पोलिस दलाच्या माध्यमातून आत्मसमर्पण केले.

नक्षल चळवळीत कशी अडकली?
आई-वडीलांचा मृत्यू झाल्यानतंर सविता काकांकडे राहत होती. अवघ्या 13 व्या वर्षी काकाने तिचे लग्न ठरवले. मात्र सविताला एवढ्यात लग्न करायचे नव्हते. त्यामुळे यातून सुटकेसाठी ती नक्षली चळवळीत सामील झाली. शुभ मंगल सवाधान म्हणताच नक्षली बनणारी सविता विवाहासाठीच त्यातून बाहेर पडली. अन्‌ एक वर्तूळ पूर्ण झाले.