Retirement Age : नवी मुंबई महानगरपालिकेतील अधिकारी आणि कर्मचाऱ्यांच्या निवृत्तीचे वय ५८ वरून ६० वर्षे करण्याचा महत्त्वपूर्ण प्रस्ताव स्थायी समितीच्या बैठकीत मंजूर करण्यात आला आहे. ‘नवी मुंबई महापालिका सेवा विनियम २०२६’ अंतर्गत हा बदल करण्यात आला असून, यामुळे पालिकेतील अनुभवी मनुष्यबळ अधिक काळ उपलब्ध राहणार आहे. गेल्या काही वर्षांत मोठ्या प्रमाणात अनुभवी अधिकारी निवृत्त झाल्यामुळे प्रशासनात अनुभवाची कमतरता निर्माण झाली आहे. शहरातील विकासकामे सुरळीत सुरू राहण्यासाठी अनुभवी अधिकाऱ्यांची गरज असल्याचे सभागृहनेते सागर नाईक यांनी स्पष्ट केले. तसेच सध्या महापालिकेत स्थानिक प्रशासनातून एकही उपायुक्त दर्जाचा अधिकारी कार्यरत नाही. निवृत्तीचे वय वाढवल्यामुळे स्थानिक अधिकाऱ्यांना पदोन्नतीची संधी मिळेल आणि प्रतिनियुक्तीवरील अधिकाऱ्यांवरील अवलंबित्व कमी होईल, असे नाईक यांनी यावेळी नमूद केले. महापालिकेत सध्या सुमारे ५,००० कायमस्वरूपी कर्मचारी असून निम्म्याहून अधिक पदे रिक्त आहेत. वर्ष २०२६ मध्ये ९० आणि २०२७ मध्ये ११० कर्मचारी निवृत्त होणार आहेत. भरती प्रक्रिया सुरू असली तरी न्यायालयीन प्रक्रियेमुळे तिला विलंब होत आहे. स्थायी समितीने मंजूर केलेला हा ठराव आता महासभेच्या मंजुरीसाठी सादर केला जाईल. त्यानंतर अंतिम मान्यतेसाठी तो राज्य शासनाच्या नगरविकास विभागाकडे पाठविला जाणार आहे. या प्रस्तावामुळे महापालिका कर्मचाऱ्यांमध्ये आनंदाचे वातावरण आहे.
