Cyber crime : नवी मुंबईत एका बनावट कॉल सेंटरचा पर्दाफाश करण्यात पोलिसांना यश आले आहे. शेअर बाजारात ट्रेडिंगद्वारे भरघोस परताव्याचे आमिष दाखवून या कॉल सेंटरने लोकांची १ कोटी रुपयांहून अधिक रकमेची फसवणूक केली आहे. याप्रकरणी शिवम विनोदकुमार दुबे (२९) आणि सुजित मसिचरण वारिमिकी (३०) या दोघांना अटक करण्यात आली आहे. हे दोघेही ठाणे जिल्ह्यातील रहिवासी आहेत. या प्रकरणातील आणखी एक आरोपी फरार असून, त्याचा शोध सुरू आहे. माहितीनुसार, पोलिसांच्या आर्थिक गुप्तचर आणि सायबर पथकांनी १२ मार्च रोजी छापा टाकला. महापे येथील एका औद्योगिक वसाहतीत हे कॉल सेंटर कार्यरत होते. छाप्यादरम्यान या ठिकाणी २२ तरुण-तरुणी काम करताना आढळले. ते संगणकांचा वापर करून व्हॉट्सॲप चॅट्स आणि फोन कॉल्सद्वारे लोकांशी संवाद साधत होते. हे ठिकाण एका शेअर मार्केट संशोधन कंपनीच्या नावाने चालवले जात होते. ही कंपनी लोकांना शेअर बाजारात भरघोस परतावा मिळेल असे आमिष दाखवून ऑपरेटरने दिलेल्या बँक खात्यांमध्ये पैसे हस्तांतरित करण्यास सांगत असे.या कॉल सेंटरने लोकांना कंपनीच्या तसेच इतर १८ वेगवेगळ्या बँक खात्यांमध्ये पैसे हस्तांतरित करण्यास सांगून किमान १.०२ कोटी रुपयांची फसवणूक केली असल्याची माहीती समोर आली आहे. पोलिसांनी या कॉल सेंटरशी संबंधित बँक खात्यांची राष्ट्रीय सायबर गुन्हे तक्रार पोर्टलवर तपासणी केली. त्यावेळी, देशभरातून आलेल्या सायबर फसवणुकीच्या किमान पाच तक्रारींचा संबंध या खात्यांशी असल्याचे आढळून आले, असे पोलिसांनी सांगितले.
