Nashik TCS Case : नाशिक येथील टीसीएस कंपनीमध्ये (Nashik TCS Case) घडलेल्या लैंगिक छळ आणि धार्मिक सक्तीच्या प्रकरणात आरोपी असलेल्या निदा खानला स्थानिक न्यायालयाने सोमवारी अटकेपासून कोणतेही अंतरिम संरक्षण देण्यास नकार दिला.

तसेच, न्यायालयाने पोलिसांना तिच्या अर्जावर २७ एप्रिलपर्यंत आपले म्हणणे सादर करण्याचे निर्देश दिले आहेत. या कंपनीच्या (Nashik TCS Case) घडलेल्या नऊ प्रकरणांचा तपास करणाऱ्या नाशिक पोलिसांच्या विशेष तपास पथकाने महाराष्ट्राच्या विविध भागांत खानचा शोध सुरू केला आहे.

खानने शनिवारी नाशिक न्यायालयात धाव घेत अटकपूर्व जामीन आणि अर्जावरील सुनावणी प्रलंबित असेपर्यंत अटकेपासून अंतरिम संरक्षण मिळण्याची मागणी केली होती.

यावेळी तिने आपण दोन महिन्यांची गर्भवती असल्याचे कारण नमूद केले होते. सोमवारी सुनावणीदरम्यान, तिचे वकील राहुल कसलीवाल यांनी अंतरिम दिलासा मिळण्यासाठी जोरदार युक्तिवाद केला. हा दिलासा मिळाल्यास न्यायालयाकडून तिच्या मुख्य अर्जावर निर्णय होईपर्यंत तिला अटकेपासून संरक्षण मिळाले असते.

तथापि, अतिरिक्त सत्र न्यायाधीश के.जी. जोशी यांनी अंतरिम मागणीवर कोणताही आदेश दिला नाही. उलट, त्यांनी पोलीस आणि तक्रारदाराला खानच्या अर्जावर आपले म्हणणे दाखल करण्याचे निर्देश दिले आणि या प्रकरणाची पुढील सुनावणी २७ एप्रिल रोजी निश्चित केली.