Nashik Municipal Corporation Election : नाशिक महानगरपालिका निवडणुकीच्या उमेदवारी अर्ज भरण्याच्या शेवटच्या दिवशी भारतीय जनता पक्षामध्ये अभूतपूर्व पेचप्रसंग निर्माण झाला आहे. ‘एबी’ फॉर्मच्या वाटपावरून निर्माण झालेल्या गोंधळाने हिंसक वळण घेतले असून, संतप्त कार्यकर्त्यांनी शहराध्यक्षांच्या गाडीचा पाठलाग करत फार्महाऊसचे गेट फोडल्याची खळबळजनक घटना घडली आहे. एबी फॉर्मवरून हायव्होल्टेज ड्रामा नाशिक महापालिकेच्या १२२ जागांसाठी भाजप यंदा स्वबळावर मैदानात उतरली आहे. मात्र, शेवटच्या क्षणापर्यंत एबी फॉर्म न मिळाल्याने इच्छुकांचा संयम सुटला. निष्ठावंतांची तिकिटे कापली गेल्याच्या चर्चेने आगीत तेल ओतले. रात्रीपासूनच कार्यकर्ते शहराध्यक्ष सुनील केदार यांच्या भेटीसाठी प्रयत्न करत होते. मात्र, केदार यांनी कार्यकर्त्यांना सामोरे जाण्याऐवजी तिथून निघून जाणे पसंत केले. यानंतर कार्यकर्त्यांनी फिल्मी स्टाईलने त्यांच्या गाडीचा नाशिक-मुंबई महामार्गावर पाठलाग केला. फार्महाऊसवर राडा आणि तिकीट विक्रीचे आरोप शहराध्यक्ष एका खाजगी फार्महाऊसवर असल्याची माहिती मिळताच कार्यकर्त्यांनी तिथे धाव घेतली. गेट बंद असल्याने संतापलेल्या जमावाने फार्महाऊसचे मुख्य गेट तोडून आत प्रवेश केला. यावेळी काही उमेदवारांनी “तिकिटांचा काळाबाजार” होत असल्याचा गंभीर आरोप केल्याने राजकीय वर्तुळात खळबळ उडाली आहे. या सर्व गोंधळात भाजपचे संकटमोचक गिरीश महाजन ‘नॉट रिचेबल’ असल्याने कार्यकर्त्यांमधील अस्वस्थता अधिकच वाढली होती. पोलीस बंदोबस्तात वाटप वाढता तणाव पाहता, अखेर पोलीस आयुक्त संदीप कर्णिक यांनी स्वतः घटनास्थळी धाव घेतली. पोलीस बंदोबस्तात सुनील केदार, आमदार राहुल ढिकले आणि सीमा हिरे यांच्या उपस्थितीत फॉर्म वाटप सुरू करण्यात आले. गिरीश महाजनांची प्रतिक्रिया या प्रकरणावर बोलताना मंत्री गिरीश महाजन म्हणाले, “हा प्रकार दुर्दैवी आहे. १२२ जागांसाठी हजारो इच्छुक असल्याने सर्वांना न्याय देणे कठीण असते. पैसे घेऊन तिकीट वाटल्याच्या आरोपांची चौकशी केली जाईल.” निवडणुकीच्या तोंडावर उफाळून आलेल्या या अंतर्गत बंडाळीमुळे भाजपच्या प्रतिमेला तडा गेला असून, याचा मतदानावर काय परिणाम होतो, हे पाहणे महत्त्वाचे ठरेल.
