Narendra Modi : देशाचे पंतप्रधान नरेंद्र मोदी (Narendra Modi) उद्या, १७ फेब्रुवारी २०२६ रोजी एक दिवसाच्या मुंबई दौऱ्यावर येत आहेत. या दौऱ्यादरम्यान ते फ्रान्सचे राष्ट्राध्यक्ष इमॅन्युएल मॅक्रोन यांच्यासोबत द्विपक्षीय बैठक घेणार असून, भारत-फ्रान्स इनोव्हेशन इयर २०२६ (India-France Year of Innovation 2026) चे उद्घाटनही करणार आहेत. या कार्यक्रमाच्या पार्श्वभूमीवर मुंबईत विशेषतः दक्षिण मुंबईत वाहतूक व्यवस्थेत मोठे बदल करण्यात आले असून, अनेक रस्ते बंद राहणार आहेत. मुंबई पोलिसांनी याबाबत ट्रॅफिक ॲडव्हायझरी जारी केली आहे. मोदी-मॅक्रोन यांच्या कार्यक्रमाचे वेळापत्रक – दुपारी २.१५ वाजता: पंतप्रधान नरेंद्र मोदी मुंबईत दाखल होतील. – दुपारी ३.१५ वाजता (अंदाजे) : लोकभवन (पूर्वीचे राजभवन) येथे मोदी आणि मॅक्रोन यांच्यात द्विपक्षीय बैठक होईल. या बैठकीत भारत-फ्रान्स सामरिक भागीदारीतील प्रगतीचा आढावा घेतला जाईल आणि प्रादेशिक तसेच जागतिक मुद्द्यांवर चर्चा होईल. – दुपारी ५.१५ वाजता (अंदाजे) : हॉटेल ताज महाल पॅलेस येथे भारत-फ्रान्स इनोव्हेशन फोरम आयोजित करण्यात आला आहे. यानंतर मोदी आणि मॅक्रोन यांच्या उपस्थितीत भारत-फ्रान्स इनोव्हेशन इयर २०२६ चे औपचारिक उद्घाटन होईल. या कार्यक्रमात दोन्ही देशांतील व्यवसाय नेते, स्टार्टअप्स, संशोधक आणि इनोव्हेटर्स यांच्यासमोर संबोधन होईल. – सायंकाळी ७.१५ वाजता (अंदाजे) : गेटवे ऑफ इंडिया येथे भारत-फ्रान्स इनोव्हेशन इयर आणि सांस्कृतिक स्मरणोत्सव (India-France Year of Innovation and Cultural Commemoration) आयोजित आहे. हा मुख्य सांस्कृतिक कार्यक्रम फ्रान्सच्या वाणिज्य दूतावासाच्या वतीने होत असून, व्हीव्हीआयपी नेत्यांची उपस्थिती असेल. Narendra Modi हा संपूर्ण कार्यक्रम भारत-फ्रान्स इनोव्हेशन इयर २०२६ चा भाग असून, हा वर्षभर चालणारा उपक्रम आहे. यात AI, टेक्नॉलॉजी, संशोधन, उद्योग आणि लोक-लोकांमधील सहकार्यावर भर देण्यात येणार आहे. मुंबईत वाहतूक व्यवस्थेत बदल आणि बंद रस्ते या उच्चस्तरीय कार्यक्रमामुळे आणि व्हीव्हीआयपी सुरक्षा व्यवस्थेमुळे मुंबई पोलिसांनी १७ फेब्रुवारी रोजी खास वाहतूक व्यवस्था लागू केली आहे. दुपारी २ वाजेपासून रात्री ९ वाजेपर्यंत दक्षिण मुंबईत मोठ्या प्रमाणात रस्ते बंद राहतील आणि वाहतूक कोंडी होण्याची शक्यता आहे. याशिवाय सकाळी ८ वाजेपासून रात्री ९ वाजेपर्यंत वेस्टर्न एक्सप्रेस हायवे (WEH) वर हेवी मोटार वाहनांवर (HMV) पूर्ण बंदी राहील. दक्षिण मुंबईतील प्रमुख रस्ते आणि परिसर (उदा. गेटवे ऑफ इंडिया, छत्रपती शिवाजी महाराज मार्ग, रिजेंट सर्कलजवळील भाग) वाहतुकीसाठी बंद किंवा निर्बंधित राहतील. टॅक्सी स्टँड, बस थांबे आणि पार्किंग जोनही तात्पुरते बंद राहतील. पोलिसांनी प्रवाशांना पर्यायी मार्ग वापरण्याचे आणि आगाऊ नियोजन करण्याचे आवाहन केले आहे. या दौऱ्यामुळे भारत-फ्रान्स संबंध अधिक मजबूत होण्याची अपेक्षा आहे, विशेषतः संरक्षण, तंत्रज्ञान, AI आणि इनोव्हेशन क्षेत्रात. मुंबईकरांनी वाहतूक कोंडी टाळण्यासाठी पर्यायी मार्ग निवडावेत, असे आवाहन करण्यात आले आहे. दक्षिण मुंबईतील हे मार्ग राहतील बंद छत्रपती शिवाजी महाराज मार्ग, श्यामाप्रसाद मुखर्जी चौक बंद असणार आहे फक्त आपत्कालीन वाहनासाठी हा मार्ग सुरु असेल. नॉर्थ कोर्ट ते ॲडम स्ट्रीट जंक्शनपर्यंतचा पी. रामचंदानी मार्गदेखील वाहतूकीसाठी बंद असणार आहे. रिगल जंक्शनकडे येणाऱ्या वाहनांना शहीद भगतसिंग मार्ग, महाकवी भूषण रोड, बीके बोमन बेहराम रोडकडे वळवण्यात आले आहे. पी. रामचंदानी मार्गावरील वाहतूक अल्वा चौक, रेडिओ क्लब, हाजी नियाज आझम रोड आणि जगन्नाथ पालव चौक मार्गे वळवण्या येईल. ॲडम स्ट्रीट आणि पी. रामचंदानी मार्गावरील टॅक्सी स्टँड आणि बेस्ट बसचे थांबे बंद राहणार आहे.
