Narendra Modi : पश्चिम आशियातील वाढता तणाव आणि युद्धाच्या छायेमुळे निर्माण झालेली अस्थिरता दूर करण्यासाठी पंतप्रधान नरेंद्र मोदी (Narendra Modi) यांनी गुरुवारी फ्रान्सचे राष्ट्राध्यक्ष इमॅन्युएल मॅक्रॉन, ओमानचे सुलतान हैथम बिन तारिक आणि मलेशियाचे पंतप्रधान अन्वर इब्राहिम यांच्याशी दूरध्वनीवरून सविस्तर चर्चा केली. या चर्चेत पंतप्रधानांनी (Narendra Modi) हिंसाचार थांबवून संवाद आणि मुत्सद्देगिरीच्या मार्गाने शांतता प्रस्थापित करण्याचे आवाहन केले. पंतप्रधानांनी राष्ट्राध्यक्ष मॅक्रॉन यांच्याशी झालेल्या संवादात पश्चिम आशियातील बिघडत चाललेल्या परिस्थितीवर चिंता व्यक्त केली. केवळ चर्चेच्या माध्यमातूनच हा संघर्ष थांबवता येईल, असे सांगत त्यांनी फ्रान्ससोबत या मुद्द्यावर जवळून समन्वय साधण्याची तयारी दर्शवली. Narendra Modi मलेशियाचे पंतप्रधान अन्वर इब्राहिम यांच्याशी बोलतानाही त्यांनी हीच भूमिका मांडली. दोन्ही नेत्यांनी पश्चिम आशियातील परिस्थिती लवकरात लवकर पूर्वपदावर आणण्यासाठी आणि प्रादेशिक स्थिरता राखण्यासाठी कटिबद्धता व्यक्त केली. ओमानचे सुलतान हैथम बिन तारिक यांच्याशी झालेल्या चर्चेत पंतप्रधान मोदींनी ओमानच्या सार्वभौमत्वाचे आणि प्रादेशिक अखंडतेचे उल्लंघन झाल्याबद्दल तीव्र निषेध नोंदवला. २८ फेब्रुवारी रोजी इराणवर झालेल्या हल्ल्यानंतर ओमानने भारतीय नागरिकांसह हजारो लोकांच्या सुरक्षित सुटकेसाठी केलेल्या प्रयत्नांचे पंतप्रधानांनी कौतुक केले. विशेषतः जागतिक व्यापारासाठी अत्यंत महत्त्वाच्या असलेल्या ‘हॉर्मुझची सामुद्रधुनी’ मधून जहाजांची ये-जा सुरक्षित आणि मुक्त असावी, यावर भारत आणि ओमान या दोन्ही देशांनी पुन्हा एकदा जोर दिला. राजनैतिक संबंध आणि शुभेच्छा या गंभीर विषयांवर चर्चा करतानाच पंतप्रधानांनी (Narendra Modi) मित्रत्वाचे नातेही जपले. त्यांनी ओमानच्या सुलतानांना येणाऱ्या ईदच्या आगाऊ शुभेच्छा दिल्या, तर मलेशियाच्या पंतप्रधानांना ‘हरी राया ईद-उल-फित्र’ निमित्त शुभेच्छा देऊन दोन्ही देशांमधील मैत्रीपूर्ण संबंधांना उजाळा दिला. पश्चिम आशियात संघर्ष सुरू झाल्यापासून पंतप्रधान मोदींनी सौदी अरेबिया, बहरीन, यूएई, जॉर्डन, इस्रायल आणि इराण यांसारख्या विविध देशांच्या प्रमुखांशी सातत्याने संपर्क साधला आहे.