सातारा :जिल्ह्यातील युवकांना साताऱ्यातच रोजगाराची संधी मिळावी यासाठी जिल्ह्यात आयटी पार्क होण्यासाठी सातत्यपूर्ण पाठपुरावा करणारे राज्याचे सार्वजनिक बांधकाम मंत्री शिवेंद्रसिंहराजे भोसले यांच्या प्रयत्नांना मोठे यश मिळाले असून महाराष्ट्र शासनाच्या उद्योग विभागाकडून नागेवाडी (ता. सातारा) येथील ४२ हेक्टर ८७ आर इतकी जागा आयटी पार्कसाठी औद्योगिक क्षेत्र म्हणून जाहीर करण्यात आली आहे. त्यामुळे जिल्ह्यात आयटी पार्क उभारणीचा मार्ग आता मोकळा झाला आहे. हा महत्वपूर्ण निर्णय घेतल्याबद्दल ना. शिवेंद्रसिंहराजे यांनी मुख्यमंत्री देवेंद्र फडणवीस, उपमुख्यमंत्री अजित पवार, उद्योग मंत्री उदय सामंत यांचे आभार मानले आहेत. जिल्ह्यातील आयटी क्षेत्राशी निगडीत इंजिनियर्स आणि युवक व युवतींना साताऱ्यातच रोजगाराची संधी मिळाली पाहिजे, येथील युवकांना पुणे, मुंबई यांसह अन्य शहरात नोकरीसाठी जावे लागू नये यासाठी नागेवाडी (लिंब खिंड) येथील शासकीय जागेत आयटी पार्क उभारण्यात यावा, यासाठी ना. शिवेंद्रसिंहराजे भोसले यांनी अभ्यासपूर्ण पाठपुरावा सुरु केला होता. ना. शिवेंद्रसिंहराजे यांच्या सूचनेनुसार काही दिवसांपूर्वीच एमआयडीसी विभागामार्फत या जागेची पाहणी करण्यात आली होती. ना. शिवेंद्रसिंहराजेंच्या सूचनेनुसार त्याचा परिपूर्ण अहवाल आणि प्रस्ताव राज्य शासनाकडे सादर करण्यात आला होता. सादर केलेल्या प्रस्तावाला मान्यता द्यावी अशी मागणी ना. शिवेंद्रसिंहराजे यांनी मुख्यमंत्री देवेंद्र फडणवीस, उपमुख्यमंत्री अजित पवार, उद्योग मंत्री उदय सामंत यांच्याकडे होती. ना. शिवेंद्रसिंहराजे यांच्या मागणीनुसार महाराष्ट्र शासनाच्या उद्योग विभागामार्फत नागेवाडी येथील गट नं. ३०८/१ येथील ४२ हेक्टर ८७ आर एवढे क्षेत्र आयटी पार्कसाठी आरक्षित करण्याचे नोटिफिकेशन जारी करून ही जागा औद्योगिक क्षेत्र म्हणून जाहीर करण्यात आली आहे. आयटी पार्क उभारणीचा मार्ग मोकळा झाला असल्याने लवकरच पुढील कार्यवाही गतीने केली जाणार आहे. त्यासाठीच्या आवश्यक त्या सूचना ना. शिवेंद्रसिंहराजे भोसले यांनी संबंधित अधिकाऱ्यांना केल्या आहेत.
