N. Rangaswami: पुदुचेरीचे ज्येष्ठ नेते एन. रंगस्वामी यांनी आज सलग पाचव्यांदा मुख्यमंत्री म्हणून शपथ घेतली. ऑल इंडिया एनआर काँग्रेसचे (AINRC) संस्थापक असलेल्या रंगस्वामी यांनी पुन्हा एकदा एनडीए सरकारचे नेतृत्व स्वीकारले आहे. राजभवनात झालेल्या शपथविधी सोहळ्यात, नायब राज्यपाल के. कैलासनथन यांनी मुख्यमंत्री आणि मंत्रिमंडळाच्या सदस्यांना पद आणि गोपनीयतेची शपथ दिली. रंगस्वामी यांनी ईश्वरसाक्ष शपथ घेतली. एआयएनआरसी नेते मल्लाडी कृष्ण राव आणि भाजप नेते अरुमुगम नमस्सिवयम् यांनीही मंत्री म्हणून पदाची शपथ घेतली. विशेष म्हणजे, मल्लाडी कृष्ण राव यांनी तेलुगू भाषेत शपथ घेतली. ते पुदुचेरीच्या यानम प्रदेशाचे प्रतिनिधित्व करतात, जो भौगोलिकदृष्ट्या आंध्र प्रदेशमध्ये आहे. (N. Rangaswami) N. Rangaswami: एनडीएने आपले वर्चस्व पुन्हा प्रस्थापित केले. या सोहळ्यात भाजपच्या वरिष्ठ संघटनात्मक नेत्यांच्या उपस्थितीमुळे या सरकारचे राजकीय महत्त्व आणखी वाढले आहे. शपथविधी सोहळ्यादरम्यान भाजपचे राष्ट्रीय पदाधिकारी नितीन नवीन आणि पक्षाचे ज्येष्ठ रणनीतिकार बी. एल. संतोष हे देखील मंचावर उपस्थित होते. केंद्रशासित प्रदेशात नुकत्याच झालेल्या निवडणुकीत एनडीए आघाडीने बहुमत मिळवून सलग दुसऱ्यांदा सत्ता मिळवली. निवडणुकीच्या निकालानंतर राष्ट्रपती द्रौपदी मुर्मू यांनी रंगस्वामी यांना सरकार स्थापन करण्यासाठी आमंत्रित केले. रंगस्वामी यांचे पुनरागमन महत्त्वाचे का आहे? N. Rangaswami: पुदुचेरीच्या राजकारणात रंगस्वामी यांना भक्कम पाठिंबा असलेले नेते म्हणून पाहिले जाते. त्यांच्या साध्या प्रतिमेमुळे आणि कल्याणकारी योजनांमुळे त्यांना ‘पुदुचेरीचा लोकप्रिय चेहरा’ अशी ओळख मिळाली आहे. मुख्यमंत्री म्हणून त्यांचा पाचवा कार्यकाळ प्रादेशिक राजकारणातील त्यांचा प्रभाव कायम असल्याचे दर्शवतो. तथापि, नवीन सरकारसमोर आता रोजगार, पर्यटन, पायाभूत सुविधा यांसारख्या समस्या वेगाने सोडवण्याचे आणि केंद्र सरकारसोबत समन्वय सुधारण्याचे आव्हान असेल.
