द हेग (नेदरलॅन्ड) : म्यानमारमधील लष्करी शासनाच्या प्रमुखांच्या नावे अटक वॉरंट बजावण्यात यावे, अशी मागणी आंतरराष्ट्रीय गुन्हे न्यायालयाच्या मुख्य सरकारी वकिलांनी न्यायालयात केली आहे. म्यानमारमधील अल्पसंख्य रोहिंग्या मुस्लिमांविरोधात करण्यात आलेल्या गुन्ह्यासंदर्भात हे वॉरंट बजावण्याची मागणी करण्यात आली आहे. म्यानमारच्या लष्करी शासनाचे प्रमुख म्हणून लष्कराचे वरिष्ठ जनरल मिन ऑंग लाईंग यांनी २०२१ मध्ये सत्ता ताब्यात घेतली आहे. देशाच्या माजी राष्ट्रीय समन्वयक आंग स्यान स्यू की यांच्या सरकारविरोधात बंड करून लाईंग यांनी देशाचे नियंत्रण आपल्या हातात घेतले होते. त्यापुर्वी लाखो रोहिंग्या मुस्लिमांना लष्करी बळाने हुसकावून लावण्यात आले होते. रोहिंग्यांविरोधातील अत्याचार आणि हत्या आदी मानवतेविरोधातील गुन्ह्यांचा आरोप लाईंग यांच्यावर आहे. सामुहिक बलात्कार, हत्या आणि घरे जाळणे यांचा समावेश असलेल्या वांशिक नरसंहाराच्या मोहिमेमुळे जवळपास दहा लाख लोकांना शेजारच्या बांगलादेशात पळून जाण्यासाठी भाग पाडले गेले होते. आयसीसीच्या तीन न्यायाधीशांच्या पॅनेलने आता फिर्यादीच्या विनंतीवर निर्णय घेणे आवश्यक आहे. अटक वॉरंटसाठी आणखी अर्ज येतील, असे फिर्यादी कार्यालयाने सांगितले.
