Kristina Patel: अभिनेत्री आणि मॉडेल क्रिस्टिना पटेल हिने भाजप नेत्यावर आणि पोलिसांवर गंभीर आरोप करत सोशल मीडियावर एक भावनिक व्हिडिओ पोस्ट केला आहे. या व्हिडिओमध्ये तिने रडत रडत सांगितलं की, तिच्या आईच्या आणि स्वतःच्या जीवाला धोका आहे. तसंच, पोलिसांकडे वारंवार मदतीची मागणी करूनही कोणीही कारवाई करत नसल्याचा आरोप तिने केला आहे. क्रिस्टिना पटेल ही मूळची गुजरातमधील राजकोटची असून सध्या ती मुंबईत राहत आहे. तिच्या म्हणण्यानुसार, वडिलांच्या निधनानंतर त्यांच्या कुटुंबावर संकटं कोसळली आहेत. संपत्तीच्या वादातून तिचे काका बिपीन अमृतिया, चुलत भाऊ आनंद अमृतिया आणि आणखी काही अज्ञात लोकांनी घरात घुसून तिच्या आईवर हल्ला केला. या प्रकारानंतरही पोलिसांनी कोणतीही तक्रार नोंदवून घेतली नाही, अशी गंभीर माहिती तिने व्हिडिओद्वारे दिली. “माझे वडील गेल्यानंतर नातेवाईकांनी संपत्ती बळकावण्याचा प्रयत्न केला. आम्ही कायदेशीर मार्गाने तो वाद मिटवण्याचा प्रयत्न केला, पण उलट आम्हाला त्रास दिला जातोय. मी मुंबईत एकटी राहते, आणि माझी आई राजकोटमध्ये आहे. तिच्यावर घरात घुसून हल्ला करण्यात आला,” असं ती म्हणाली. तिने पुढे सांगितले की, “पोलिसांना सांगूनही त्यांनी कारवाई केली नाही. तक्रार नोंदवून घेतली गेली नाही. मी पोलिस आयुक्तांशी संपर्क साधण्याचा प्रयत्न केला, पण काहीच उपयोग झाला नाही. माझे काका भाजपमध्ये मोठ्या पदावर आहेत. ते राजकारणात असल्यामुळेच का पोलीस दुर्लक्ष करत आहेत? ते कोणालाही त्रास देऊ शकतात का? माझ्या आईला काही झालं, तर जबाबदार कोण?” असा सवालही तिने उपस्थित केला. क्रिस्टिनाने अखेरीस गुजरात पोलिसांना विनंती केली की, “कृपया माझ्या आईला सुरक्षा द्या आणि या प्रकरणाची योग्य चौकशी करा.” सध्या सोशल मीडियावर तिचा व्हिडिओ प्रचंड व्हायरल होत असून अनेकजण तिच्या समर्थनार्थ कमेंट करत आहेत. मात्र अद्याप या प्रकरणावर संबंधित भाजप नेते अथवा पोलिसांकडून कोणतीही अधिकृत प्रतिक्रिया मिळालेली नाही.
