औरंगाबाद : औरंगाबादच्या बजाजनगर परिसरात एका सराईत गुन्हेगाराची दगडाने ठेचून हत्या झाल्याची धक्कादायक घटना समोर आली आहे. विशाल फाटे असे मृत व्यक्तीचे नाव आहे. अत्यंत रहदारीच्या रस्त्यावर रात्रीच्या सुमारास ही घटना घडली. पूर्व वैमनस्यातून खून झाल्याचा अंदाज पोलिसांनी वर्तवला आहे.

बजाज नगर या भागात काल (21 मे) एका तरुणास दोन अनोळखी व्यक्ती मारहाण करत असल्याची माहिती एमआयडीसी वाळूज पोलिसांना मिळाली होती. यानंतर पोलिसांनी तातडीने घटनास्थळी धाव घेतली. यावेळी पोलिसांना एक अनोळखी तरुण रक्ताच्या थारोळ्यात बेशुद्ध अवस्थेत असल्याचे दिसले.

तसेच त्याचा चेहरा दगडाने ठेचलेला असल्याचेही पोलिसांना दिसून आले. यावेळी पोलिसांनी त्याला उपचारासाठी दाखल केले. मात्र त्यापूर्वी त्याला मृत घोषित करण्यात आले.

बजाज नगर परिसरात दगडाने ठेचून खून केलेल्या मृत तरुणाची ओळख पटली आहे. या मृत तरुणाचे नाव विशाल ऊर्फ मड्ड्या किशोर फाटे (27) असे आहे. विशाल हा सराईत गुन्हेगार असून त्याच्यावर एमआयडीसी वाळूज पोलीस ठाण्यात गंभीर स्वरूपाचे 7 ते 8 गुन्हे दाखल आहेत. तसेच गेल्यावर्षी वडगावात योगेश प्रधान या तरुणाच्या खून प्रकरणात तो आरोपी आहे. या प्रकरणी विशाल हा वर्षभर हर्सूल कारागृहात होता. पंधरा दिवसांपूर्वीच विशालची जामिनावर सुटका झाली होती. तो घरी परतला होता.

वडगाव- बजाजनगरात वर्चस्व प्रस्थापित करण्यावरून गेल्या काही वर्षांपासून दोन गटांत सतत वादविवादाच्या घटना घडत आहेत. गेल्यावर्षी 17 मे रोजी योगेश प्रधान या तरुणाचा चाकूने वार करत दगडाने ठेचून निर्घृणपणे खून करण्यात आला होता. यात चार आरोपींचा समावेश होता. जितेंद्र दहातोंडे, विकास गायकवाड, करण साळे आणि विशाल फाटे अशी या चौघांची नावे आहेत. योगेश प्रधान याच्या खूनाचा बदला घेण्यासाठी जामिनावर सुटलेल्या विशाल फाटे खून केल्याचा प्राथमिक अंदाज पोलिसांनी वर्तवला आहे.