सातारा -कुटुंबातील काहींना सतत त्रास देत असल्याच्या रागातून सातारा तालुक्यातील वडूथ येथे मंगळवारी रात्री नऊ वाजण्याच्या सुमारास दोन युवकांनी सचिन पवार या युवकावर धारदार शस्त्रांनी हल्ला करत कुऱ्हाडीने पाय तोडून त्याचा खून केला. याप्रकरणी सातारा तालुका पोलीस ठाण्यात गुन्हा दाखल झाला असून रणजित साबळे व अमित साबळे या संशयितांना अटक करण्यात आली आहे. याबाबत सातारा तालुका पोलीस ठाण्यातून देण्यात आलेली अधिक माहिती अशी की, खून झालेला सचिन विठ्ठल पवार मूळचा शिवथर येथील असून सध्या तो वडूथला राहत होता. तो अनेकांना सतत त्रास देत होता. गावात त्याची दहशत असल्यामुळे त्याच्याविरोधात कोणी बोलण्याचे धाडस करत नव्हते. काही प्रकरणांमध्ये त्याच्यावर सातारा तालुका पोलीस ठाण्याने कारवाईदेखील केली होती. तरीही गावातील लोकांना त्रास देणे कमी झाले नव्हते. त्याच्या त्रासाला अनेकजण कंटाळले होते. दरम्यान, सचिन पवार याने रणजित नंदकुमार साबळे आणि अमित दत्तात्रय साबळे यांना तसेच त्यांच्या कुटुंबातील काहींना त्रास दिला होता. दोन दिवसांपूर्वीही असाच प्रकार घडला. त्यामुळे रणजित आणि अमित संतापले होते. मंगळवारी रात्री नऊ वाजण्याच्या सुमारास लॉकडाऊनमुळे माणसे घरातच होती. याचवेळी संशयित रणजित आणि अमित या दोघांनीही सचिनवर धारदार शस्त्रांनी हल्ला करत कुऱ्हाडीने त्याचा पायच तोडला. यावेळी फरशीचाही वापर करण्यात आला. घटनेची माहिती सातारा तालुका पोलीस ठाण्यास मिळताच पोलीस निरीक्षक सजन हंकारे सहकाऱ्यांसमवेत तत्काळ वडूथ येथे दाखल झाले. त्यावेळी सचिन रक्ताच्या थारोळ्यात पडला होता तर बाजूलाच त्याचा तुटलेला पाय पडला असल्याचे निदर्शनास आले. पोलीस घटनास्थळी पंचनामा करत असताना त्यांना संशयित म्हणून रणजित साबळे आणि अमित साबळे यांची नावे समजली. पोलिसांनी यापैकी एकाला वडूथ येथे तर दुसऱ्या संशयिताला सातारा येथे अटक केली. याप्रकरणी हवालदार धीरज कुंभार यांनी फिर्याद दाखल केली असून अधिक तपास पोलीस निरीक्षक सजन हंकारे करत आहेत.
