दौंड – शहरातील कुरकुंभ मोरी परिसरातील चायनीज सेंटर जवळ एका युवकावर कोयत्याचे वार करून खून करण्यात आला असल्याची धक्कादायक घटना घडली. मयूर चितारे (वय 22,रा. पासलकर वस्ती, दौंड) असे खून झालेल्या युवकाचे नाव आहे. अर्जुन स्वामी काळे(रा. इंदिरानगर ,भाजी मंडई ,दौंड) असे हल्लेखोराचे नाव असल्याची माहिती दौंड पोलिसांनी दिली.

जिथे गुन्हा कराल तिथून थेट पोलीस चौकीत हजर व्हायच…. पोलीस चौकी इतकी सेफ जागा नाही. चित्रपटातील या डायलॉगचा अनुभव दौंडकरांनी आज अनुभवला. युवकाचा खून करून हल्लेखोर स्वतः पोलीस चौकीत हजर झाला.

शनिवारी सायंकाळी 7 वाजताच्या दरम्यान कुरकुंभ मोरी परिसरातील चायनीज सेंटर जवळ मयत मयूर याचे हल्लेखोर अर्जुन काळे याच्याशी काहीतरी वाद झाले. वाद चालू असताना अर्जुनने स्वतः जवळील कोयत्याने मयूरच्या डोक्यावर ,पोटावर वार करून त्याला जखमी केले, अशी माहिती प्रत्यक्षदर्शींनी दिली.

घटना पोलीस स्टेशनच्या हाकेच्या अंतरावर झाली असल्याने पोलिसांना लागलीच खबर मिळाली. पोलीस निरीक्षक भाऊसाहेब पाटील यांनी आपल्या सहकाऱ्यांना घेऊन घटनास्थळी धाव घेतली. पोलीस कर्मचारी अमीर शेख यांनी जखमी मयूर यास रिक्षा मधून येथील एका खाजगी दवाखान्यात उपचारासाठी नेऊन त्याला वाचविण्याचा प्रयत्न केला. परंतु घाव वर्मी लागल्याने उपचारादरम्यान त्याचा मृत्यू झाला असल्याची माहिती मिळत आहे.