मुंबई : आज सकाळी साडेनऊच्या सुमारास मुंब्रा आणि दिवा स्थानकांदरम्यान एक भीषण अपघात झाला. या अपघातात सहा प्रवाशांचा मृत्यू झाला. या अपघातामुळे एकच खळबळ उडाली. या अपघातामुळे पुन्हा एकदा प्रवाशांच्या सुरक्षिततेचा मुद्दा पुन्हा ऐरणीवर आला आहे. आज लाईफलाईनची डेथलाईन ठरलेल्या लोकल अपघाताचा संपूर्ण घटनाक्रम एका प्रवाशाने सांगितला आहे.

काय सांगितले प्रत्यक्षदर्शीने ?
आज सकाळच्या सुमारास मुंब्रा आणि दिवा स्थानकादरम्यान दोन लोकल गाड्या एका वळणावर अगदी जवळून जात असताना, दरवाज्यांजवळ लटकलेल्या प्रवाशांची बॅग एकमेकांवर आदळल्याने मोठी दुर्घटना घडली. सीएसएमटीच्या दिशेने जाणाऱ्या लोकलमधील एका प्रत्यक्षदर्शी प्रवाशाने सांगितले की, “आम्ही भिवंडीहून कामासाठी निघालो होतो. आमच्या ग्रुपमधील एक मित्र या अपघातात ट्रॅकवर पडला. मुंब्रा स्थानकाजवळ आमच्या आधीच्या डब्यातून एक प्रवासी उडत आला आणि आमच्या डब्यातील तीन जणांना घेऊन गेला. त्यानंतर मागील डब्यातूनही काही प्रवासी ट्रॅकवर कोसळले.” अपघातानंतर अनेक प्रवासी जखमी झाले असून, काहींना ठाणे स्थानकात उतरवून रुग्णालयात दाखल करण्यात आले.

दिवा-मुंब्रा स्थानकादरम्यान ट्रेनमधून पडून 6 प्रवाशांचा मृत्यू झाला असल्याची माहिती समोर आली आहे. या घटनेने एकच खळबळ उडाली आहे. या अपघातानंतर रेल्वे रुळांवर रक्ताचा सडा दिसून आला. तर, काही मृत प्रवाशांचे मृतदेह प्लॅटफॉर्मवर ठेवण्यात आल्याने प्लॅटफॉर्मही रक्ताने माखले असल्याचे अस्वस्थ करणारे चित्र दिसून आले.

नेमका कसा घडला अपघात?
आज सकाळी 9.30 वाजताच्या सुमारास ही दुर्घटना घडली. दिवा आणि मुंब्रा स्थानकादरम्यान दोन लोकल गाड्या – एक कसाराकडे जाणारी आणि दुसरी सीएसएमटीकडे जाणारी – एकमेकांच्या अगदी शेजारील ट्रॅकवरून भरधाव वेगाने जात होत्या. दरवाज्याजवळ लटकलेल्या प्रवाशांच्या पाठीवरील बॅगांची एकमेकांशी घर्षण होऊन धक्क्याने संतुलन ढासळले आणि काही प्रवासी ट्रॅकवर फेकले गेले. या अपघातात 6 जणांचा मृत्यू झाला तर अनेकजण जखमी झाले आहेत.