Pune Traffic : महाराष्ट्र लोकसेवा आयोगाच्या (एमपीएससी) विरोधातील आंदोलनाचा परिणाम एस. एम. जोशी पूल, पत्रकार भवन, नवी पेठ आणि अलका टॉकीज चौक परिसरातील वाहतुकीवर होत आहे.

मंगळवारी सकाळी १० वाजता परिस्थिती सर्वाधिक बिकट झाली. गरवारे महाविद्यालय ते खंडोजी बाबा चौक या मार्गावर वाहनांचा सरासरी वेग अवघा ५.३ किलोमीटर प्रतितास नोंदविण्यात आला. या वेळेत सामान्य दिवसांत वाहनांचा सरासरी वेग ११.४ किलोमीटर प्रतितास असतो. त्यामुळे आंदोलनामुळे वाहनांचा वेग निम्म्यापेक्षाही कमी झाला.

३ ते ६ ऑक्टोबरदरम्यान ९५४ रस्त्यांच्या भागातील वाहतूक स्थितीचा आढावा घेतला असता, आंदोलनाचा सर्वाधिक परिणाम एस. एम. जोशी पुलाकडे जाणाऱ्या मार्गांवर झाल्याचे दिसून आले. सकाळी १० ते दुपारी १ आणि सायंकाळी ५ ते रात्री ९ या वेळेत या परिसरात वारंवार वाहतूक कोंडी झाली.

शनिवारी सायंकाळी ७ वाजता एस. एम. जोशी पुलाकडे जाणाऱ्या मार्गावरील वाहनांचा वेग ७.८ किलोमीटर प्रतितास इतका कमी झाला होता. या वेळेत सामान्य दिवसांत सरासरी १३.४ किलोमीटर प्रतितास वेगाने वाहतूक सुरू असते.

नवी पेठेत शनिवारी सायंकाळी ७ वाजता परिस्थिती सर्वाधिक गंभीर होती. त्यावेळी परिसरातील सुमारे ८० टक्के रस्त्यांवरील वाहतुकीवर परिणाम झाला होता. वाहनांचा सरासरी वेग ९.९ किलोमीटर प्रतितास नोंदविण्यात आला. मंगळवारी सकाळी १० वाजताही नवी पेठेतील सुमारे ६० टक्के रस्त्यांवर वाहतुकीचा दबाव कायम होता.

खंडोजी बाबा चौक ते रूपाली हॉटेलदरम्यान शनिवारी सायंकाळी साडेपाचच्या सुमारास सुरू झालेला वाहतुकीचा दबाव रात्री ११.२९ वाजेपर्यंत कायम होता. त्यामुळे वाहतूक पूर्वपदावर येण्यासाठी सुमारे सहा तास लागले. मंगळवारीही सकाळी १०.०२ ते दुपारी १२.२० या कालावधीत एस. एम. जोशी पुलाकडे जाणाऱ्या मार्गावरील वाहतुकीवर परिणाम झाला.