NCP News: राष्ट्रवादी काँग्रेसचे दोन्ही गट एकत्र येण्याबाबत पडद्यामागे मोठ्या हालचाली सुरू होत्या, असा खुलासा राष्ट्रवादी शरद पवार गटाचे नेते आमदार रोहित पवार यांनी केला आहे. जर दोन्ही गट एकत्र आले असते, तर शिरूर लोकसभा मतदारसंघाचे खासदार डॉ. अमोल कोल्हे यांच्याकडे ‘संयुक्त राष्ट्रवादी’च्या प्रदेशाध्यक्षपदाची धुरा सोपवली जाणार होती, असा दावा रोहित पवारांनी केला. यावर आता खुद्द डॉ. अमोल कोल्हे यांनीही शिक्कामोर्तब करत प्रवासादरम्यान काय घडलं, याचा उलगडा केला आहे. रोहित पवारांचा गौप्यस्फोट: १३ बैठका आणि सीसीटीव्ही फुटेज – पत्रकार परिषदेत बोलताना रोहित पवार म्हणाले की, “अजित दादांची इच्छा होती की संयुक्त राष्ट्रवादीचे प्रदेशाध्यक्ष अमोल कोल्हे व्हावेत. यासाठी कोल्हे, सुप्रिया सुळे आणि शशिकांत शिंदे यांनी प्रामाणिकपणे पुढाकार घेतला होता. दोन्ही पक्ष एकत्र येण्यासाठी जयंत पाटील यांच्या घरी तब्बल १३ बैठका झाल्या आहेत. विश्वास बसत नसेल तर सीसीटीव्ही फुटेज तपासावे.” १६ मे रोजी काय ठरलं? अमोल कोल्हेंनी सांगितली ‘इनसाईड स्टोरी’ – रोहित पवारांच्या या दाव्यानंतर खासदार अमोल कोल्हे यांनी ‘साम मराठी’ला दिलेल्या मुलाखतीत या वृत्ताला दुजोरा दिला. त्यांनी १६ मे रोजी अजित पवारांसोबत केलेल्या प्रवासाचा संदर्भ दिला. “१६ मे रोजी मी अजित पवारांसोबत बारामती ते पुणे असा प्रवास केला होता. माळेगाव सहकारी साखर कारखान्याची प्रचारसभा संपवून आम्ही निघालो होतो. तेव्हापासून मी या प्रक्रियेत होतो,” असे कोल्हे यांनी स्पष्ट केले. रोहित पवारांनी सांगितल्याप्रमाणे दोन्ही गट एकत्र येण्यासाठी अनेक चर्चा झाल्या ही वस्तुस्थिती असल्याचे त्यांनी मान्य केले. कोल्हे यांच्या मते, एकत्रीकरणासाठी एकूण १४ बैठका झाल्या होत्या, ज्यातील ११ बैठका जयंत पाटील यांच्या निवासस्थानी पार पडल्या. प्रफुल पटेल यांची सावध भूमिका – दुसरीकडे, अजित पवार गटाचे कार्याध्यक्ष प्रफुल पटेल यांनी या चर्चांना फारसे महत्त्व दिले नाही. “आमचा पक्ष आता स्वतंत्र आहे. आमच्या पक्षातील पदे भरण्याची जबाबदारी आमची आहे. अशा परिस्थितीत जुन्या चर्चांना उजाळा देणे योग्य नाही,” असे म्हणत त्यांनी या विषयावर अधिक बोलणे टाळले. हेही वाचा – भिगवण अपहरण नाट्यात मोठा ‘ट्विस्ट’; “मी स्वमर्जीने गेले”, तरुणीचा व्हिडिओ समोर आल्याने खळबळ
