Keerthy Suresh: दाक्षिणात्य चित्रपटसृष्टीतील लोकप्रिय अभिनेत्री कीर्ती सुरेश सध्या तिच्या चित्रपटांमुळेच नव्हे, तर खासगी आयुष्याबाबत केलेल्या खुलाशामुळेही चर्चेत आली आहे. अभिनेत्री आपल्या अभिनयाने नेहमीच प्रेक्षकांची मने जिंकत असते. मात्र, यावेळी तिने तिच्या प्रेमकहाणीतील एक मजेशीर आणि तितकाच खास प्रसंग सांगितला आहे. कॉलेजमध्ये असताना तिच्या आईने तिची डायरी वाचली होती. या डायरीमध्ये प्रियकरासोबतच्या नात्याबद्दल अनेक गोष्टी लिहिल्या होत्या. आईला या गोष्टी समजल्यानंतर कीर्तीने डायरी लिहिणेच बंद केले. नुकत्याच दिलेल्या एका मुलाखतीत तिने हा किस्सा सांगितला आहे.

१७ वर्षांच्या प्रेमानंतर अँटोनीसोबत लग्न

कीर्ती सुरेशने २०२४ मध्ये अँटोनी थट्टिलसोबत लग्न केले. दोघांची प्रेमकहाणी जवळपास १७ वर्षांची आहे. सुमारे १५ वर्षे एकमेकांना डेट केल्यानंतर त्यांनी लग्न करण्याचा निर्णय घेतला. कीर्ती आणि अँटोनी यांचे नाते अनेक वर्षे खासगी राहिले होते. मात्र, लग्नानंतर त्यांच्या प्रेमकहाणीबद्दल अनेक गोष्टी समोर आल्या. नुकत्याच ‘कर्ली टेल्स’ला दिलेल्या मुलाखतीत कीर्तीने तिच्या प्रेमप्रवासातील अनेक आठवणी सांगितल्या. यावेळी तिने कॉलेजच्या दिवसांमधील डायरीचा एक खास किस्साही शेअर केला.

आईच्या हाती लागली प्रेमाची डायरी

कीर्तीने सांगितले की, ती कॉलेजमध्ये असताना अँटोनीला डेट करत होती. त्या काळात तिला डायरी लिहिण्याची खूप आवड होती. आपल्या मनातील भावना, आठवणी आणि अँटोनीसोबतच्या नात्याबद्दलच्या गोष्टी ती डायरीमध्ये लिहायची. मात्र, एक दिवस तिच्या आईच्या हातात ही डायरी लागली आणि त्यानंतर एक वेगळाच प्रसंग घडला.

कीर्तीच्या आईने तिची डायरी वाचली. त्यामध्ये अँटोनीसोबतच्या नात्याबद्दल लिहिलेल्या गोष्टी होत्या. आईने डायरी वाचल्याचे समजल्यानंतर कीर्तीला आश्चर्याचा धक्का बसला. यावर तिच्या आईने दिलेले उत्तरही कीर्तीने मुलाखतीत सांगितले.

कीर्ती म्हणाली, “मी खूप आधीपासून अँटोनीला डेट करत होते. कॉलेजमध्ये असताना माझ्या आईने माझी डायरी वाचली. त्यात आमच्या नात्याबद्दल सगळे लिहिले होते. डायरी वाचल्यानंतर आई मला म्हणाली, ‘मी तुझी आई आहे, मला तुझी डायरी वाचण्याचा अधिकार आहे.'”

डायरी लिहिणेच सोडले, आजही डायरीची आठवण!

आईने डायरी वाचल्यानंतर कीर्तीने एक महत्त्वाचा निर्णय घेतला. तिने डायरी लिहिणेच बंद केले. कीर्तीला लिहिण्याची खूप आवड होती. मात्र, या प्रसंगानंतर तिने पुन्हा कधीही डायरी लिहिली नाही. याबद्दल बोलताना ती म्हणाली की, आता तिची ती जुनी डायरी कुठे आहे, हेही तिला माहीत नाही. ती डायरी पुन्हा एकदा मिळावी, असे तिला वाटते. मात्र, तिच्या आईने कदाचित ती डायरी जाळून टाकली असावी, अशी शक्यताही तिने व्यक्त केली. कीर्तीने सांगितलेला हा किस्सा सध्या चर्चेत आहे. तिच्या चाहत्यांनाही तिच्या आयुष्यातील हा जुना प्रसंग जाणून घेण्याची उत्सुकता आहे.

प्रेमाच्या नात्यात कुटुंबाचा विरोधही सहन केला

कीर्ती आणि अँटोनी यांच्या प्रेमकहाणीचा प्रवास सोपा नव्हता. कीर्तीने बारावीचे शिक्षण पूर्ण केल्यानंतर अँटोनीला डेट करण्यास सुरुवात केली होती. मात्र, दोघांच्या धर्मांमध्ये फरक असल्याने त्यांच्या नात्याला सुरुवातीला कुटुंबीयांचा विरोध होता. कीर्ती हिंदू कुटुंबातील आहे, तर अँटोनी ख्रिश्चन धर्माचे आहेत.

केवळ कीर्तीच्याच कुटुंबीयांनी नव्हे, तर अँटोनीच्या कुटुंबीयांनीही सुरुवातीला या नात्याला विरोध केला होता. मात्र, अनेक वर्षे एकमेकांची साथ दिल्यानंतर दोघांनी लग्न केले. तब्बल १७ वर्षांच्या नात्याला त्यांनी विवाहाचे रूप दिले.

दरम्यान, कीर्ती लवकरच ‘रफ्तार’ या चित्रपटातून अभिनेता राजकुमार रावसोबत प्रेक्षकांच्या भेटीला येणार आहे. त्यामुळे एकीकडे तिच्या आगामी चित्रपटाची चर्चा सुरू असतानाच दुसरीकडे तिच्या वैयक्तिक आयुष्यातील या जुन्या आठवणींमुळे ती पुन्हा एकदा चर्चेत आली आहे.