Kranti Redkar : शूटिंगच्या एक दिवस आधी आईला कर्करोगाचे निदान; क्रांती रेडकरचा मोठा खुलासा, व्हिडिओ शेअर करत म्हणाली…
Kranti Redkar : चित्रपटाचे काम सुरू होण्याच्या अवघ्या एक दिवस आधी तिच्या आईला कर्करोगाचे निदान झाले होते. नुकताच सोशल मीडियावर व्हिडिओ शेअर करत क्रांतीने हा भावनिक अनुभव चाहत्यांसोबत शेअर केला.

Kranti Redkar : अभिनेत्री आणि दिग्दर्शिका क्रांती रेडकर सध्या तिच्या ‘मैत्रेया’ या नव्या चित्रपटामुळे चर्चेत आहे. ‘काकण’ चित्रपटानंतर क्रांती पुन्हा एकदा दिग्दर्शनाच्या माध्यमातून प्रेक्षकांच्या भेटीला आली आहे. मात्र, या चित्रपटाच्या निर्मितीदरम्यान तिला वैयक्तिक आयुष्यात मोठ्या संकटाचा सामना करावा लागला होता.
चित्रपटाचे काम सुरू होण्याच्या अवघ्या एक दिवस आधी तिच्या आईला कर्करोगाचे निदान झाले होते. नुकताच सोशल मीडियावर व्हिडिओ शेअर करत क्रांतीने हा भावनिक अनुभव चाहत्यांसोबत शेअर केला.
क्रांती रेडकरने ‘मैत्रेया’ चित्रपटाच्या प्रीमियरला जाण्यापूर्वी आईसोबत एक व्हिडिओ शूट केला होता. हा व्हिडिओ तिने आता इन्स्टाग्रामवर शेअर केला आहे. ‘माझ्याकडे आई आहे. माझी सुखाची व्याख्या,’ असे भावनिक कॅप्शन तिने या व्हिडिओला दिले आहे.
View this post on Instagram
या व्हिडिओमध्ये क्रांतीने आईसोबतचे काही खास क्षण सांगताना म्हटले की, “मैत्रेयासाठी ज्या दिवशी मी काम सुरू करणार होते, त्याच्या एक दिवस आधी माझ्या आईला कर्करोगाचे निदान झाले होते. तुम्ही मला अनेकदा विचारायचात की मी आईसोबत व्हिडिओ का शेअर करत नाही? कारण त्यावेळी आमची मॅडम कर्करोगाशी झुंज देत होती. मात्र, आता ती कर्करोगमुक्त झाली आहे, ही आमच्यासाठी खूप आनंदाची गोष्ट आहे.”
आईने कर्करोगावर मात केल्यानंतर कुटुंबात आनंदाचे वातावरण निर्माण झाले. मात्र, त्यानंतर आणखी एक अडचण समोर आली. ‘मैत्रेया’ चित्रपटाच्या म्युझिक प्रीमियरला उपस्थित राहण्यासाठी क्रांतीची आई आली होती.
त्यावेळी त्यांचा अपघात झाला आणि पायाला फ्रॅक्चर झाले. त्यानंतर त्यांच्या पायावर शस्त्रक्रियाही करण्यात आली. त्यामुळे चित्रपटाच्या मुख्य प्रीमियरला आई उपस्थित राहू शकणार नसल्याची खंत क्रांतीने व्यक्त केली.
दरम्यान, व्हिडिओमध्ये क्रांतीच्या आईने तिच्या मेहनतीचे आणि चित्रपटासाठी घेतलेल्या कष्टांचे भरभरून कौतुक केले आहे. ‘मैत्रेया’ चित्रपटाला प्रेक्षकांचा चांगला प्रतिसाद मिळेल आणि हा चित्रपट कोट्यवधींचा व्यवसाय करेल, असा विश्वासही त्यांनी व्यक्त केला.
काकणनंतर दुसरा चित्रपट
क्रांती रेडकर दिग्दर्शित ‘मैत्रेया’ हा चित्रपट २० नोव्हेंबर २०२६ रोजी चित्रपटगृहांमध्ये प्रदर्शित झाला आहे. मैत्री आणि प्रेम या भावनिक नात्यांभोवती या चित्रपटाची कथा फिरते. समर खळतकर, आयुषी भावे, स्काय आणि रुची जाईल यांसारखे कलाकार या चित्रपटात महत्त्वाच्या भूमिकांमध्ये आहेत.
‘काकण’नंतर दिग्दर्शिका म्हणून क्रांतीचा हा दुसरा चित्रपट आहे. एका बाजूला चित्रपटाच्या प्रदर्शनाचा आनंद, तर दुसरीकडे आईच्या आजारपणाशी आणि अपघाताशी संबंधित कठीण प्रसंग अशा दोन्ही अनुभवांतून क्रांतीचा प्रवास सुरू आहे. तिच्या या भावनिक खुलाशानंतर चाहत्यांकडून तिला आणि तिच्या आईला शुभेच्छा दिल्या जात आहेत.





