Mohan Bhagwat : चौथी विश्व हिंदू काँग्रेस १८ ते २० डिसेंबर या कालावधीत मुंबईत आयोजित केली जाणार असून, राष्ट्रीय स्वयंसेवक संघाचे सरसंघचालक मोहन भागवत (Mohan Bhagwat) यांच्या हस्ते याचे उद्घाटन होणार आहे, अशी माहिती आयोजकांनी गुरुवारी दिली. या विश्व हिंदू काँग्रेस २०२६ची संकल्पना (थीम) समानं व्रतं सह चित्तम् – सामायिक वचनबद्धता, सामूहिक संकल्पअशी आहे.

हिंदू नेते आणि संस्थांना एकमेकांशी जोडले जाण्यासाठी, चर्चा करण्यासाठी आणि सहकार्य करण्यासाठी एक जागतिक व्यासपीठ उपलब्ध करून देणे हा या कार्यक्रमाचा उद्देश असल्याचे त्यांनी सांगितले. तीन दिवस चालणाऱ्या या जागतिक संमेलनात ६० हून अधिक देशांतील ४,००० हून अधिक प्रतिनिधी सहभागी होण्याची अपेक्षा आहे. यामध्ये हिंदू नेते, विचारवंत, व्यावसायिक आणि विविध संस्थांच्या प्रतिनिधींचा समावेश असेल. या कार्यक्रमाच्या उद्घाटन सत्राला भागवत (Mohan Bhagwat) संबोधित करतील.

या कार्यक्रमात ४५ हून अधिक सत्रे आणि १५० हून अधिक वक्ते सहभागी होणार आहेत. मुंबईतील वांद्रे-कुर्ला कॉम्प्लेक्समधील जिओ वर्ल्ड कन्व्हेन्शन सेंटर येथे होणाऱ्या या कार्यक्रमात धर्म, समाज, विश्वकर्मा आणि भाषा या विषयांवर केंद्रित अशी चार विशेष पूर्ण अधिवेशन सत्रे असतील.

धर्म विषयावरील सत्रात विविध धार्मिक परंपरा, समुदाय, आध्यात्मिक संस्था आणि तत्त्वज्ञानाच्या विचारधारांमधील आध्यात्मिक नेते एकत्र येऊन समकालीन समाजात धर्माच्या भूमिकेवर चर्चा करतील. आयोजकांच्या मते, या कार्यक्रमात वर्ल्ड हिंदू एक्सपोचे उद्घाटनही केले जाईल. या प्रदर्शनाचा उद्देश व्यापार व वाणिज्य क्षेत्राला चालना देणे आणि आर्थिक विकास साधणे हा आहे.

या कार्यक्रमात सहभागी होणाऱ्या मान्यवरांमध्ये मुख्यमंत्री देवेंद्र फडणवीस, आसामचे मुख्यमंत्री हिमंता बिस्वा सरमा आणि मध्य प्रदेशचे मुख्यमंत्री मोहन यादव यांचा समावेश असल्याचेही त्यांनी (Mohan Bhagwat) सांगितले.