Trump-PM Modi Call : अमेरिकेचे राष्ट्राध्यक्ष डोनाल्ड ट्रंप यांना रशियाकडून कच्चे तेल आणि नैसर्गिक वायू खरेदी करणाऱ्या देशांवर 100% पर्यंत अतिरिक्त आयात शुल्क (टॅरिफ) लावण्याचा अधिकार देणारा कायदा नुकताच करण्यात आला आहे. भारत हा रशियन तेलाचा मोठा खरेदीदार असल्याने या शुल्काचा धोका निर्माण झाला आहे. मात्र, भारतावर 100% टॅरिफ सध्या लागू झालेला नाही; हा ट्रंप प्रशासनाच्या निर्णयावर अवलंबून आहे.

अशातच आज पंतप्रधान नरेंद्र मोदी आणि अमेरिकेचे राष्ट्राध्यक्ष डोनाल्ड ट्रंप यांच्यात बुधवारी (30 सप्टेंबर) फोनवरून चर्चा झाली. या चर्चेत भारत-अमेरिका संबंधांतील व्यापार, संरक्षण, ऊर्जा आणि महत्त्वाच्या तंत्रज्ञान क्षेत्रातील सहकार्याचा आढावा घेण्यात आला. तसेच प्रादेशिक आणि आंतरराष्ट्रीय घडामोडींवर दोन्ही नेत्यांनी चर्चा केली.

पंतप्रधान नरेंद्र मोदी यांनी ‘एक्स’वरील पोस्टद्वारे या चर्चेची माहिती दिली आहे. ही चर्चा सकारात्मक झाल्याचे त्यांनी म्हटले. भारत आणि अमेरिकेतील व्यापक जागतिक धोरणात्मक भागीदारी पुढे नेण्यासाठी दोन्ही देशांनी सुसंवाद कायम ठेवला आहे.

जागतिक शांतता आणि सुरक्षेवर चर्चा

दोन्ही नेत्यांनी प्रादेशिक आणि आंतरराष्ट्रीय विषयांवर चर्चा केली. त्यामध्ये जागतिक शांतता आणि सुरक्षा वाढविण्यासाठी प्रयत्न, देशांमधील परस्पर हित, विविध क्षेत्रांतील सहकार्य पुढे नेण्यावर चर्चा झाली.

व्यापार आणि संरक्षणावरही लक्ष

फोनवरील चर्चेत भारत-अमेरिका सहकार्याच्या प्रगतीचा आढावा घेण्यात आला. व्यापार, संरक्षण, ऊर्जा आणि महत्त्वाचे तंत्रज्ञान ही चर्चेतील प्रमुख क्षेत्रे होती अशी माहिती देण्यात आली आहे. भारत आणि अमेरिका यांच्यात व्यापारविषयक चर्चाही सुरू असताना मोदी-ट्रंप यांच्यातील ही चर्चा झाली आहे.

2026 मधील चौथी फोनवरून चर्चा

मोदी आणि ट्रंप यांच्यात 2026 मध्ये फोनवरून झालेली ही चौथी चर्चा असल्याचे वृत्त आहे. यापूर्वी 2 फेब्रुवारी, 24 मार्च आणि 14 एप्रिल रोजी दोन्ही नेत्यांमध्ये फोनवरून संवाद झाला होता.

यापूर्वीच्या चर्चांमध्ये भारत-अमेरिका व्यापार, द्विपक्षीय संबंध आणि पश्चिम आशियातील परिस्थिती यांसारखे विषय केंद्रस्थानी होते. 24 मार्चच्या चर्चेत पश्चिम आशियातील तणाव कमी करण्यासह स्ट्रेट ऑफ होर्मुज खुला आणि सुरक्षित ठेवण्याबाबत चर्चा झाली होती. 14 एप्रिलच्या चर्चेत दोन्ही देशांमधील सहकार्याचा आढावा घेऊन व्यापक धोरणात्मक भागीदारी अधिक मजबूत करण्यावर भर देण्यात आला होता.