नवी दिल्ली – नवीन संसद इमारतीच्या उद्घाटन सोहळ्यावरून राजकीय वांदग सुरू आहे. मात्र, त्याची बिल्कूल तमा न बाळगता पंतप्रधान नरेंद्र मोदी यांनी शुक्रवारी त्या इमारतीचा व्हिडीओ ट्‌विटरवरून शेअर केला. प्रत्येक भारतीयाला नवीन संसद इमारतीचा अभिमान वाटेल, अशी भावना त्यांनी व्यक्त केली.
मोदींनी पोस्ट केलेल्या व्हिडीओमधून नव्या इमारतीची एकप्रकारे व्हर्च्युअल टूर घडते. त्याचा उल्लेख करून मोदींनी जनतेला एक आवाहन केले. व्हिडीओतून आयकॉनिक इमारतीचे ओझरते दर्शन घडते. व्हिडीओ शेअर करून तुमचे विचार मांडा. त्यातील काही मी रि-ट्‌विट करेन, असे त्यांनी म्हटले.
The new Parliament building will make every Indian proud. This video offers a glimpse of this iconic building. I have a special request- share this video with your own voice-over, which conveys your thoughts. I will re-Tweet some of them. Don’t forget to use #MyParliamentMyPride. pic.twitter.com/yEt4F38e8E
— Narendra Modi (@narendramodi) May 26, 2023
मोदींच्या हस्ते येत्या रविवारी नवीन संसद इमारतीचे उद्घाटन होणार आहे. त्यावर विरोधी पक्षांनी आक्षेप घेतला आहे. राष्ट्रपती द्रौपदी मुर्मू यांच्या हस्ते उद्घाटन करण्याची मागणी त्यांनी लावून धरली. तेवढ्यावरच न थांबता सुमारे 20 विरोधी पक्षांनी उद्घाटन सोहळ्यावर बहिष्कार टाकण्याचा निर्णय घेतला आहे. त्या सोहळ्यात भाजपच्या नेतृत्वाखालील सत्तारूढ आघाडीच्या (एनडीए) घटक पक्षांसह सुमारे 25 पक्ष सहभागी होतील.
