लखनौ – आज संपूर्ण जग भारताकडे कुतूहलाने आणि आश्‍चर्याने पाहत आहे. भारत G-20 परिषदेचे अध्यक्षपद भूषवत आहे. यावरून हे दिसून येते की, पंतप्रधान मोदींच्या नेतृत्वाखाली भारत जगाचे नेतृत्व करत आहे. मोदी है तो मुमकिन है हा आता जागतिक मंत्र बनला आहे, असे प्रतिपादन उत्तर प्रदेशचे मुख्यमंत्री योगी आदित्यनाथ यांनी लखनौ येथील इंदिरा गांधी प्रतिष्ठान येथे आयोजित राज्य भाजप कार्यसमितीच्या बैठकीच्या उद्घाटन सत्राला संबोधित करताना केले.

योगी म्हणाले की, गुजरातमध्ये सातव्यांदा विक्रमी विजय मिळवून लोक विकासाला महत्त्व देतात हे सिद्ध झाले आहे. जनतेने कुटुंबवाद नाकारला आहे. मे 2022 मध्ये आयोजित कार्यकारिणीत नवीन ठराव घेऊन आम्ही पुढे गेलो होतो. पाच वर्षांचा कार्यकाळ पूर्ण करून प्रथमच उत्तर प्रदेशमध्ये दोन तृतीयांश बहुमताने सरकार पुन्हा सत्तेवर आले आहे. विजयी पक्षाचे बहुमतातले सरकार म्हणून काम कसे करायचे, हे भाजपला चांगलेच ठाऊक आहे.

सर्व राजकीय विश्‍लेषकांच्या मताकडे दुर्लक्ष करून भाजपने रामपूर आणि आझमगड पोटनिवडणूक जिंकली असल्याचे ते म्हणाले. स्वातंत्र्याच्या अमृत महोत्सवात मोदींच्या नेतृत्वाखाली देशभरातील प्रत्येक गावात तिरंगा फडकवून स्वातंत्र्याचा खरा अर्थ सांगितला गेला. त्यांच्या नेतृत्वाखाली जे काही मानक तयार केले गेले ते पूर्ण केले गेले आहेत. पंतप्रधान संसदेत उत्तर प्रदेशचे प्रतिनिधित्व करतात हे आपले भाग्य आहे, असेही योगी यांनी अधोरेखित केले.

योगी यांनी यावेळी भाजप नेत्यांना उत्तर प्रदेशातील नागरी निवडणुका आणि लोकसभा निवडणुकीची तयारी करण्याचे आवाहन केले. ते म्हणाले की, ओबीसी आयोगाच्या अहवालानंतर नागरी संस्थांच्या निवडणुका घेण्यात येतील. या निवडणुकांमध्ये भाजपचा झेंडा फडकवावा लागणार आहे.

यावेळी राज्य भाजपचे प्रदेशाध्यक्ष भूपेंद्र चौधरी, उपमुख्यमंत्री केशव प्रसाद मौर्य, ब्रजेश पाठक, माजी उपमुख्यमंत्री दिनेश शर्मा, माजी प्रदेशाध्यक्ष विनय कटियार, केंद्रीय मंत्री महेंद्र नाथ पांडे, संजीव बल्यान, साध्वी निरंजन ज्योती, सहप्रभारी संजीव चौरसिया, सुनील भाई ओझा, राष्ट्रीय उपाध्यक्षा रेखा वर्मा, राष्ट्रीय मंत्री हरीश द्विवेदी आणि माजी प्रदेशाध्यक्ष स्वतंत्र देव सिंग कार्यकारिणीत मंचावर उपस्थित होते.