Modi Cabinet : केंद्रीय राज्यमंत्री एल. मुरुगन यांनी मंगळवारी (१३ ऑक्टोबर) केंद्रीय मंत्रिपदाचा राजीनामा दिल्यानंतर मोदी मंत्रिमंडळात लवकरच फेरबदल होण्याची चर्चा सुरू झाली आहे. दिवाळीपूर्वीच मंत्रिमंडळात फेरबदल होण्याची शक्यता असल्याचे वृत्त आहे. या फेरबदलात किमान सहा मंत्रिपदांवर नवीन चेहरे येण्याची शक्यता व्यक्त केली जात आहे.

मुरुगन यांनी तमिळनाडूत परत जाऊन भाजपचे संघटन मजबूत करण्यासाठी काम करण्याची इच्छा व्यक्त केली आहे. त्यांच्या राजीनाम्यानंतर मंत्रिमंडळातील संभाव्य बदलांबाबत राजकीय चर्चेला वेग आला आहे. आगामी उत्तर प्रदेश, उत्तराखंड आणि पंजाब विधानसभा निवडणुका लक्षात घेऊन मंत्रिमंडळात प्रादेशिक आणि सामाजिक समीकरणांचा विचार केला जाऊ शकतो, अशी चर्चा आहे.

मोदी सरकारच्या तिसऱ्या कार्यकाळाला अडीच वर्षे पूर्ण होत आली आहेत. या काळात आतापर्यंत मंत्रिमंडळात मोठा फेरबदल झालेला नाही. त्यामुळे हिवाळी अधिवेशनापूर्वी फेरबदल होण्याची शक्यता व्यक्त केली जात आहे.

राजीनामे आणि संघटनात्मक बदल –

मुरुगन यांच्यापूर्वी रवनीत सिंह बिट्टू आणि जॉर्ज कुरियन यांनी राज्यसभेचा कार्यकाळ संपल्यानंतर मंत्रिपदाचा राजीनामा दिला होता. पेट्रोलियम मंत्री हरदीप सिंह पुरी आणि केंद्रीय राज्यमंत्री बी. एल. वर्मा यांना राज्यसभेसाठी पुन्हा उमेदवारी देण्यात आलेली नाही. त्यामुळे या दोघांच्या मंत्रिपदाबाबतही आगामी काळात निर्णय होण्याची शक्यता आहे.

केंद्रीय मंत्री हर्ष मल्होत्रा यांची दिल्ली भाजपच्या प्रदेशाध्यक्षपदी नियुक्ती करण्यात आली आहे. भाजपच्या ‘एक व्यक्ती, एक पद’ या धोरणानुसार त्यांनाही मंत्रिपद सोडावे लागू शकते, अशी चर्चा आहे.

सध्या केंद्र सरकारमधील १२ मंत्र्यांकडे एकापेक्षा जास्त मंत्रालयांची जबाबदारी आहे. त्यामुळे मंत्रिमंडळात फेरबदल झाल्यास काही मंत्र्यांकडील अतिरिक्त जबाबदाऱ्या कमी करून नवीन मंत्र्यांना संधी दिली जाऊ शकते.

विशेष अधिवेशनाचीही चर्चा –

पंतप्रधान नरेंद्र मोदी यांनी अलीकडे केंद्रीय मंत्रिपरिषदेच्या बैठका घेऊन मंत्र्यांच्या कामकाजाचा आढावा घेतला आहे. प्रशासन अधिक चांगले करण्यासाठीही सूचना देण्यात आल्या आहेत.

काही महिन्यांपूर्वीही मंत्रिमंडळ फेरबदलाची चर्चा झाली होती. मात्र, त्यावेळी संसदेच्या पावसाळी अधिवेशनामुळे फेरबदलाची शक्यता नाकारण्यात आली होती. आता पावसाळी अधिवेशनाचे सत्रावसान अद्याप झालेले नसल्याने हिवाळी अधिवेशनापूर्वी संसदेचे विशेष अधिवेशन बोलावले जाण्याची शक्यताही चर्चेत आहे.

निवडणुकांवर लक्ष –

उत्तर प्रदेश, उत्तराखंड आणि पंजाबमधील आगामी विधानसभा निवडणुका लक्षात घेऊन मंत्रिमंडळात बदल केले जाऊ शकतात. उत्तर प्रदेशातील काही प्रमुख नेत्यांना केंद्रात संधी मिळण्याची शक्यता आहे. पंजाबमधून शीख समाजातील नेत्याला मंत्रिपद मिळू शकते, अशीही चर्चा आहे. त्याचबरोबर ख्रिश्चन समाजातील नेत्यालाही मंत्रिमंडळात स्थान मिळण्याची शक्यता व्यक्त केली जात आहे.

पुरी आणि वर्मा यांची मंत्रिमंडळातून हकालपट्टी झाल्यास तसेच इतर राजीनाम्यांनंतर रिक्त झालेल्या जागा भरल्या जाऊ शकतात. त्यामुळे फेरबदल झाल्यास सुमारे १० नवीन मंत्र्यांना संधी मिळण्याची शक्यता व्यक्त केली जात आहे. केंद्रातील मंत्रिपरिषदेत जास्तीत जास्त ८१ मंत्री असू शकतात.