Satara: सातारा जिल्ह्याची आरोग्य वाहिनी असलेल्या क्रांतिसिंह नाना पाटील जिल्हा सर्वसाधारण रुग्णालयात राज्याचे सार्वजनिक बांधकाम मंत्री शिवेंद्रसिंहराजे भोसले यांच्या माध्यमातून हायटेक, अत्याधुनिक सुविधा सुरु करण्यात आल्या आहेत. ना. शिवेंद्रसिंहराजेंच्या पाठपुराव्यातून महाराष्ट्र शासनाच्या आरोग्य विभागाकडून जिल्हा रुग्णालय येथे एम आर आय सुविधा सुरु करण्यात आली असून त्यामुळे जिल्ह्यातील रुग्णांना मोठा दिलासा मिळाला आहे. पब्लिक प्रायव्हेट पार्टनरशिप तत्वावर युनिक वेल केअर या खाजगी कंपनीमार्फत ही सुविधा पुरवण्यात येत असून ही सुविधा उपलब्ध करून दिल्याबद्दल ना. शिवेंद्रसिंहराजेंनी मुख्यमंत्री देवेंद्र फडणवीस, उपमुख्यमंत्री एकनाथ शिंदे, ना. सुनेत्रा पवार, आरोग्य मंत्री प्रकाश आबिटकर यांचे आभार मानले आहेत.

जिल्ह्यातील रुग्णांना सातार्‍यातच दर्जेदार अत्याधुनिक निदान सुविधा उपलब्ध व्हावी आणि तातडीने उपचार व्हावेत यासाठी जिल्हा रुग्णालयात एम आर आय सुविधा उपलब्ध व्हावी, यासंदर्भात ना. शिवेंद्रसिंहराजेंनी काही दिवसांपूर्वी आरोग्य मंत्री आबिटकर यांची भेट घेऊन सविस्तर चर्चा केली होती. राज्याच्या आरोग्य विभागाकडून जिल्हा रुग्णालय येथे यापूर्वीच सिटी स्कॅन, किमो थेरपी उपचार सुविधा उपलब्ध करून देण्यात आली असून त्याचा लाभ असंख्य रुग्णांना होत आहे.

जिल्हा रुग्णालयात सी टी स्कॅन निदान सुविधा ही पूर्णपणे मोफत देण्यात येत आहे. एम आर आय सुविधा ही जिल्हा रुग्णालयात दाखल असणार्‍या पेशंटस् करता मोफत देण्यात येत असून, खाजगी रुग्णालयातील किंवा बाहेरुन येणार्‍या रुग्णांना प्रत्येक अवयवानिहाय सामंजस्य करारानुसार माफक दर आकारून एम आर आय करुन देण्यात येत आहे. एम आर आय तपासणी केलेल्या रुग्णांना स्कॅन ईमेजेसची डिजिटल लिंक, वॉट्स अ‍ॅप व्दारे रिपोर्ट तसेच छापील रिपोर्ट उपलब्ध करुन देण्याची सुविधा करण्यात आली आहे. यामुळे तपासणी व अहवालाशी संबंधीत सेवा रुग्णांना अधीक सुलभपणे उपलब्ध होत आहेत.

ना. शिवेंद्रसिंहराजेंच्या पाठपुराव्यातून जिल्हा रुग्णालयात सप्टेंबर 2025 पासुन कर्करोग निदान झालेल्या रुग्णांकरीता सर्व प्रकारच्या किमो थेरपी उपचार सुविधा उपलब्ध करण्यात आल्या आहेत. सातारा जिल्ह्यातील गरजू रुग्णांनी जिल्हा रुग्णालयात उपलब्ध असलेल्या सीटी स्कॅन, एम आर आय, तसेच किमो थेरपी उपचार सुविधांचा लाभ घ्यावा.