MLC K Kavitha। भारत राष्ट्र समितीने (बीआरएस) एक धक्कादायक निर्णय घेतल्याने सर्वांच्या भुवया उंचावल्या आहेत. पक्षविरोधी कारवायांच्या आरोपाखाली विधान परिषद सदस्य (एमएलसी) आणि केसीआर यांची मुलगी के. कविता यांना बीआरएसमधून निलंबित करण्यात आल्याची माहिती समोर आली आहे. कविता यांचे वडील आणि बीआरएस प्रमुख के.चंद्रशेखर राव यांनी कविता यांना तात्काळ प्रभावाने निलंबित करण्याचा निर्णय घेतला आहे. पक्षाचे सरचिटणीस टी. रविंदर राव आणि आणखी एक सरचिटणीस (शिस्तविषयक बाबींचे प्रभारी) सोमा भरत कुमार यांनी एका संदेशात माध्यमांना ही माहिती दिली आहे . समोर आलेल्या माहितीनुसार,”कविता यांचे वडील आणि बीआरएस प्रमुख के. चंद्रशेखर राव यांनी त्यांना तात्काळ प्रभावाने निलंबित करण्याचा निर्णय घेतला आहे.”असे म्हटले आहे. पक्षविरोधी कारवायांमुळे बीआरएसचे नुकसान MLC K Kavitha। कविताच्या अलीकडील वर्तनामुळे आणि त्यांच्या पक्षविरोधी कारवायांमुळे बीआरएसचे नुकसान होत असल्याचा दावा केला जात आहे. पक्ष नेतृत्वाने ते गांभीर्याने घेतले आहे. एमएलसी कविता यांचे निलंबन अशा वेळी झाले आहे जेव्हा एक दिवस आधी तेलंगणाचे मुख्यमंत्री रेवंत रेड्डी यांनी राज्यातील मागील बीआरएस राजवटीत बांधलेल्या कालेश्वरम प्रकल्पातील कथित अनियमिततेची सीबीआय चौकशी करण्याची घोषणा केली होती. या चौकशीबाबत, भारत राष्ट्र समितीच्या कार्यकर्त्यांनी काँग्रेस सरकारच्या सीबीआय चौकशीच्या निर्णयाविरुद्ध निदर्शने केली. बीआरएस नेत्यांनी आरोप केला की, या प्रकरणाची सीबीआय चौकशीचा आदेश देणे हा पक्षप्रमुख केसीआर यांच्यावर नियोजित हल्ला आहे. कुटुंबाचे मोठे नाटक MLC K Kavitha। या प्रकरणावर, बीआरएस विधान परिषदेच्या सदस्या आणि केसीआर यांच्या कन्या के. कविता यांनी आरोप केला होता की केसीआर यांचे पद कमी करण्यासाठी हा नियोजित हल्ला आहे. बीआरएस प्रमुख आणि माजी मुख्यमंत्री के. चंद्रशेखर राव यांना त्यांच्या चाहत्यांमध्ये केसीआर असेही म्हटले जाते. कविता यांच्या बीआरएसमधून निलंबनावर, काँग्रेस खासदार मंडाडी अनिल कुमार यादव यांनी निशाणा साधला, “तेलंगणाच्या लोकांसमोर सत्य समोर आले आहे आणि संपूर्ण कुटुंबाने तेलंगणाला लुटले आहे. लढाई फक्त बीआरएसचा पुढचा अध्यक्ष कोण असेल यावर आहे. हे एका कुटुंबाचे मोठे नाटक आहे.”
