नवी दिल्ली  – दिल्लीत एक धक्कादायक घटना समोर आली आहे. दीड वर्षाचे  मूल वॉशिंग मशिनमध्ये पडले आणि ते सुमारे 15 मिनिटे धुत राहिले. मात्र, ही बाब नातेवाइकांना समजताच त्यांनी तात्काळ वॉशिंग मशीन बंद केले. तोपर्यंत मुलाची प्रकृती खालावली होती. नातेवाइकांनी त्या चिमुकल्याला तातडीने रुग्णालयात दाखल केले. या घटनेने कुटुंबीयांना धक्का बसला. काहीतरी अनुचित प्रकार घडण्याची भीती त्यांना वाटत होती. मात्र, डॉक्टरांनी त्याला वाचवले. आता मुलाचे पालक याला चमत्कार मानत आहेत.

डॉक्टरांच्या म्हणण्यानुसार मुलाची प्रकृती खूपच बिकट होती. ते सात दिवस कोमात होते. डॉक्टरांचे पथक तासन्तास मुलावर लक्ष ठेवून होते. अखेर डॉक्टरांनी मुलाला वाचवले. सुमारे 12 दिवस या मुलाला वसंत कुंज फोर्टिस रुग्णालयात दाखल करण्यात आले होते. डॉक्टरांनी सांगितले की, मुलाची वागणूक सामान्य आहे आणि  तो पूर्णपणे बरा आहे.

मीडिया रिपोर्ट्सनुसार, जेव्हा त्याला हॉस्पिटलमध्ये आणले तेव्हा बाळ बेशुद्ध होते .शरीर थंड झाले होते. तो निळा झाला होता. त्याच्या हृदयाची गतीही मंदावली होती. त्याचा हार्ट रेट वाढला होता. मात्र उपचार सुरू असतानाच त्यांची प्रकृती सुधारत होती. मुलाला वाचवणे हे डॉक्टरांसाठीही मोठे आव्हान होते.

मुलाच्या आईने सांगितले की, ती काही कामानिमित्त बाहेर गेली होती. वॉशिंग मशीनचे झाकण बहुधा उघडे ठेवले होते. जवळच पडलेल्या खुर्चीच्या साहाय्याने मुलगा उभा राहिला आणि नंतर त्याचा तोल गेला आणि वॉशिंग मशीनमध्ये पडला. ती वॉशिंग मशिनजवळ आली तेव्हा मुल त्यात असल्याचे तिने पाहिले. त्याला तात्काळ बाहेर काढण्यात आले, मात्र त्याचे शरीर निर्जीव झाले होते.

बाळाला श्वसन आणि पोटात संसर्ग झाल्याचे डॉक्टरांनी सांगितले. त्याला अँटिबायोटिक्स देण्यात आले. यासोबतच त्याला अन्नात फक्त पौष्टिक द्रव देण्यात आले. तो बरा होऊ लागला. यापूर्वी त्यांना व्हेंटिलेटरवर ठेवण्यात आले होते. मात्र, त्यांची प्रकृती सुधारल्यानंतर  या चिमुकल्याला व्हेंटिलेटरवरून काढण्यात आले. मात्र, तरीही मुलाला काही औषधे दिली जात आहेत.