नागपूर : राज्‍य सरकारची महत्त्वाकांक्षी लाडकी बहीण योजना सध्या वादाच्या भोवऱ्यात सापडली आहे. या योजनेसाठी विविध विभागांच्या निधीतून रक्कम वळवण्यात आल्याने मंत्र्यांमध्ये असंतोष निर्माण झाला आहे. विशेषतः सामाजिक न्याय विभागाचा निधी वळवल्याने मंत्री संजय शिरसाट यांनी जाहीर नाराजी व्यक्त केली होती. मात्र, भाजपचे नेते आणिी मंत्री चंद्रशेखर बावनकुळे यांनी निधी वळवण्‍याच्‍या निर्णयाचे समर्थन केले आहे.

चंद्रशेखर बावनकुळे म्हणाले, संजय शिरसाट काय बोलले, हे समजून घ्यावे लागेल. लाडकी बहीण योजना आदिवासी भागात आणि सामाजिक न्याय विभागातील काही घटकांमध्ये राबवली जात आहे. त्यामुळे थोडाफार निधी आदिवासी विभाग, सामाजिक न्याय विभाग आणि महिला व बाल कल्याण विभाग यांच्याकडून घेतला गेला असेल, तर त्यात चुकीचे काही नाही, असे स्‍पष्‍टीकरण त्‍यांनी दिले.

बावनकुळे म्हणाले, जेव्हा एखादी योजना राबवायची असते, तेव्हा ती राज्य सरकारच्या निर्णयाने राबवली जाते. विभाग वेगळे असले तरी निर्णय सामूहिक असतो. मी स्वतः संजय शिरसाट यांच्याशी चर्चा करणार असल्‍याचेही त्‍यांनी सांगितले.