नवी दिल्ली – अमेरिकेला होणारी निर्यात कमी झाल्यामुळे निर्यातदारासमोर अडचणी निर्माण झाल्या असतानाच भारतातील विविध उद्योगाकडून मोठ्या प्रमाणात आयात करणार्या मेक्सिकोने भारतीय आयातीवर शुल्क लावल्यामुळे निर्यात कमी होण्याचा धोका वाढला आहे. ऑटोमोटिव्ह कंपोनंट मॅन्युफॅक्चरर्स असोसिएशन ऑफ इंडियाचे महासंचालक विनी मेहता यांनी सांगितले की, मेक्सिकोत बरेच वाहन उत्पादन प्रकल्प आहेत. या प्रकल्पातून अमेरिकेला निर्यात होत असते. मात्र आता मेक्सिकोने भारतीय वाहन उद्योगावर आयात शुल्क लावल्यामुळे भारताला ही निर्यात पूर्वीच्या पातळीवर ठेवणेा अवघड जाणार आहे. मेक्सिकोेसोबत मुक्त व्यापार करार नसलेल्या भारत, चीनसारख्या देशावर मेक्सीकोने आयात शुल्क लावले आहे. मात्र अमेरिकेच्या दबावामुळेच मेक्सिकोने हे आयात शुल्क लावले असल्याचे समजले जाते. गेल्या वर्षी भारताने मेक्सिकोला 834 दशलक्ष डॉलरच्या वाहनाच्या सुट्या भागाची निर्यात केली होती आणि यावर्षी आतापर्यंत 370 दशलक्ष डॉलरच्या सुट्या भागाची निर्यात केली आहे. भारतातून वाहनांची जेवढी निर्यात होते, त्याच्या 13% इतकी निर्यात मेक्सिकोला होते. त्यामुळे मेक्सिको भारतीय निर्यातदारासाठी महत्त्वाचा प्रदेश मानला जातो. भारत सरकारने मेक्सिकोबरोबर आणि अमेरिकेबरोबर मुक्त व्यापार करार करण्यासंदर्भात जास्त प्रयत्न करण्याची गरज विश्लेषक व्यक्त करीत आहेत.
