पुणेः ६ मार्च २०२२ रोजी देशाचे पंतप्रधान नरेंद्र मोदी यांच्या हस्ते पुणे मेट्रोचे उद्धाघाटन करण्यात आले. या दिवशी पुणे शहरात पहिल्यांदा मेट्रो धावली होती. नुकतीच पुणे मेट्रो ३ वर्षांची झाली आहे. सार्वजनिक वाहतूक व्यवस्थेला चांगला पर्याय म्हणून पुणे मेट्रोकडे पाहिले जाते. सुरुवातीला पुणेकरांनी मेट्रोला अल्प प्रतिसाद दिला. सुरुवातीचे काही दिवस तर मेट्रो स्टेशनवर शुकशुकाट पाहिला मिळत होता. तर मेट्रोत प्रवासी देखील नव्हते. मात्र, आत्ताची परिस्थिती तशी नाही. मेट्रोने प्रवास करणाऱ्यांची संख्या वाढली आहे. दिवसाला सुमारे १ लाख ६० हजार प्रवासी मेट्रोने प्रवास करत आहेत. यामुळे पुण्यात मेट्रो ‘रुळ’ली म्हणायला काही हरकत नाही. पुणे मेट्रो दोन प्रारंभिक मार्गांसह पीसीएमसी ते फुगेवाडी आणि वानझ ते गरवारे कॉलेज या मार्गांवर सुरू झाली. आता स्वारगेट ते जिल्हा न्यायालय ही भुयारी मेट्रो सेवा देखील सुरू झाली आहे. भविष्यात पुण्यात मेट्रोचे जाळे विस्तारित करण्याचा मानस शासनाचा असून त्या दृष्टीने इतर मेट्रो मार्गिंकेची कामं जलद गतीने सुरू आहेत. पुणे मेट्रोच्या सुरुवातीच्या काळात २१,४७,७५७ प्रवासी होते. (मार्च २०२२ ते जुलै २०२३ पर्यंत). १ ऑगस्ट २०२३ रोजी फुगेवाडी ते जिल्हा न्यायालय, जिल्हा न्यायालय ते रूबी हॉल क्लिनिक आणि गरवारे कॉलेज ते जिल्हा न्यायालय या मार्गिकांच्या उद्घाटनानंतर प्रवासी संख्येत मोठ्या प्रमाणात वाढ झाली. तब्बल मेट्रोत इतका महसूल जमा रुबी हॅाल क्लिनिक ते रामवाडी या मेट्रो मार्गिकेच्या विस्तारामुळे प्रवासी संख्या तब्बल १,६९,६९,५५४ वर जाऊन पोहचली आहे. २९ सप्टेंबर २०२४ रोजी जिल्हा न्यायालय ते स्वारगेट मेट्रोचे उद्धाटन करण्यात आले. त्यानुसार ६ मार्च २०२२ ते ५ मार्च २०२५ या काळात मेट्रोतील एकूण प्रवासी संख्या तब्बल ५,९८,७६,७४३ वर जाऊन पोहचली आहे. परिणामी ९३,००,०४,२६८ इतका महसूल मेट्रो मेट्रोच्या तिजोरीत जमा झाला आहे. स्वारगेट ते कात्रज भुयारी मार्ग महत्वाचा स्वारगेट ते कात्रज हा नवा मेट्रोचा मार्ग अत्यंत महत्वाचा मानला जातो. हा मार्ग भुयारी असून सुरुवातीला सदगुरू शंकर महराज समाधी मठाच्या खालून जात आहे अशी माहिती देण्यात आली होती. मात्र, मंदिर प्रशासनाने मेट्रोचा मार्ग मठाच्या खालून नेण्यात येऊ नये, अशी मागणी पुणे मेट्रोकडे केली होती. या मागणीची महामेट्रोने दखल घेतली आहे. त्यानुसार सदर मार्गचे आरेखन बदलण्यात आले असल्याची माहिती आहे.
