Mayor Cup 2026 – पिंपरी चिंचवड महापालिकेच्या वतीने इंडियन बॉडी बिल्डिंग अँड फिटनेस फेडरेशन, महाराष्ट्र बॉडी बिल्डर्स असोसिएशन यांच्या संयुक्त विद्यमाने व पिंपरी चिंचवड अमेच्यूर बॉडी बिल्डिंग असोसिएशन यांच्या सहकार्याने महापौर चषक राष्ट्रीय शरीरसौष्ठव स्पर्धा २०२६ चे आयोजन चिंचवड येथील प्रा. रामकृष्ण मोरे प्रेक्षागृह येथे करण्यात आले आहे. या स्पर्धेचे उद्घाटन महापौर रवि लांडगे यांच्या हस्ते झाले. याप्रसंगी उपमहापौर शर्मिला बाबर, विरोधी पक्षनेते भाऊसाहेब भोईर, क्रीडा, कला, साहित्य व सांस्कृतिक समिती सभापती कैलास कुटे, विधी समिती सभापती सुजाता बोराटे, नगरसेवक धर्मपाल तंतरपाळे, शितल शिंदे, मंदार देशपांडे, नगरसेविका अर्चना सस्ते यांच्यासह इंडियन बॉडी बिल्डिंग अँड फिटनेस फेडरेशनचे डॉ. संजय मोरे, राजेश सावंत, अॅड. सचिन रणदिवे, महापालिकेचे उपायुक्त पंकज पाटील आदी उपस्थित होते. महापौर चषक राष्ट्रीय शरीरसौष्ठव स्पर्धा २०२६ मध्ये महाराष्ट्र सह जम्मू-काश्मीर, केरळ, उत्तर प्रदेश , आसाम पश्चिम बंगाल अशा विविध राज्यातून ४४५ पुरुष व ५० महिला स्पर्धेक सहभागी झाल्या आहेत. २९ व ३० मार्च २०२६ असे दोन दिवस ही स्पर्धा चिंचवड येथील प्रा. रामकृष्ण मोरे प्रेक्षागृह येथे होणार असून जास्तीत जास्त नागरिकांनी या स्पर्धेला उपस्थित राहून स्पर्धेचा आनंद घ्यावा, असे आवाहन पिंपरी चिंचवड महानगरपालिकेच्या वतीने करण्यात आले आहे. महापौर रवि लांडगे म्हणाले, तरुणांनी आरोग्याला सर्वाधिक प्राधान्य देत नैसर्गिक पद्धतीने शरीरसौष्ठव घडवण्यावर भर द्यावा. आरोग्य हीच खरी संपत्ती असून इतर सर्व संपत्तीपेक्षा ती अधिक महत्त्वाची आहे. पैसा, प्रतिष्ठा आणि इतर गोष्टी आयुष्यात पुन्हा मिळू शकतात; मात्र एकदा आरोग्य बिघडले तर ते पूर्ववत करणे कठीण असते. त्यामुळे प्रत्येकाने आपल्या शरीरावर प्रेम करत नियमित व्यायाम, संतुलित आहार आणि संयम यांचा अवलंब करून नैसर्गिक बॉडी बिल्डिंगकडे लक्ष द्यावे, असे देखील त्यांनी सांगितले. उपायुक्त पंकज पाटील यांनी प्रास्ताविक केले. प्रफुल्ल पुराणिक यांनी केले सूत्रसंचालन तर शितल शिंदे यांनी आभार मानले.
