Raj Thackeray : महाराष्ट्र नवनिर्माण सेनेचे अध्यक्ष राज ठाकरे हे महाराष्ट्राचे मुख्यमंत्री व्हावेत, असे साकडे पुत्र आणि मनसे नेते अमित ठाकरे यांनी गणरायाच्या चरणी घातले. त्यामुळे राज ठाकरे मुख्यमंत्री होणार का? यावरून राज्यात चर्चा सुरू आहे. यावर आता शिवसेना ठाकरे गटाचे नेते संजय राऊत यांनी प्रतिक्रिया दिली आहे.

उद्धव ठाकरे मुख्यमंत्री होणार हे तुम्हाला तरी वाटलं होतं का? पण उद्धव ठाकरे मुख्यमंत्री झाले. राज ठाकरे मुख्यमंत्री होण्याबाबत अमित ठाकरे यांनी अपेक्षा बाळगली तर चूक काय? असा सवाल संजय राऊत यांनी मीडियाशी संवाद साधताना केला आहे.

“राज ठाकरे मुख्यमंत्री व्हावेत म्हणून गणपतीला साकडे घालणं यात चुकीचं काय आहे? उलट अमित ठाकरे यांनी तसं साकडं घातल्याने आनंद आहे. आता त्यानुसार त्यांना पक्षाची बांधणी आणि दिशा ठरवून त्यापद्धतीने पुढे जावं लागेल. मुख्यमंत्री होण्याची अपेक्षा बाळगणं यात चुकीचं काय आहे? उद्धव ठाकरे मुख्यमंत्री झाले आणि त्यांनी उत्तम काम केलं. पण कटकारस्थान करून त्यांना बाजूला करण्यात आलं,” असं संजय राऊत म्हणाले.

2029मध्ये आम्ही एकत्र

पुढे संजय राऊत म्हणाले, “राज ठाकरे का मुख्यमंत्री होऊ शकत नाही? 2029मध्ये आम्ही एकत्र आहोत. उद्धव ठाकरे मुख्यमंत्री होतील, हे फक्त मीच सांगत होतो. राजकारण असंच असतं. बहुमत फार चंचल असतं. आज मोदींकडे बहुमत आहे, पण 72 तासात ते जाऊही शकतं. बहुमत इतकं चंचल असतं,” असं राऊत यांनी स्पष्ट केलं.

तर दुसरीकडे, अमित ठाकरेंच्या विधानावर शिंदे गटाचे भरत गोगावले यांनी, “प्रत्येक मुलाला वाटतं की वडिलांनी मोठं व्हावं. त्यांचा एक ही आमदार नाही. पूर्वी 13 होते नंतर एकवर आले. आता तर शून्य आहेत. मुख्यमंत्री होण्यासाठी 145 जागांचे बहुमत लागते, ते आधी पूर्ण करावं,” असा टोला लगावला.

हेही वाचा : 

Kareena Kapoor Birthday: ‘सिद्धिमा’पासून ‘बेबो’पर्यंतचा भन्नाट प्रवास; डेब्यू फिल्मही शूटिंगच्या काही दिवस आधी सोडली!